ოზურგეთის ბავშვთა სამკურნალო ცენტრში, დიალიზის განყოფილების ჭერი ჩამოინგრა. შემთხვევის დროს ცენტრში შვიდი პაციენტი იმყოფებოდა. მომხდარის შედეგად არავინ დაშავებულა.
როგორც ბავშვთა სამკურნალო ცენტრის დირექტორი ამბობს, ჭერის დაზიანება რამდენიმე დღის წინ მოსულმა წვიმამ გამოიწვია. ადგილზე გამწმენდ სამუშაოებს სამაშველო სამსახური ახორციელებს.
"რამდენიმე დღის წინ იყო ძლიერი ქარბუქი, წვიმა და, როგორც ჩანს, წვიმამ დაამძიმა ჭერი და იმან გამოიწვია ნგრევა. 7 პაციენტი წევს, რომელთაც სამედიცინო დახმარებას უწევენ, მათ განყოფილებაში არაფერი არ არის დაზიანებული,"- განაცხადა კლინიკის თანამშრომელმა სოსო მგელაძემ.
ბავშვთა სამკურნალო ცენტრის შენობა 70 წელზე მეტისაა. შენობის შეკეთების სამუშაოები პერიოდულად ტარდებოდა, თუმცა, მისი კაპიტალური რემონტი ამ დრომდე არ განხორციელებულა.