აზერბაიჯანის აგრესიული ქმედებები საქართველოსა და ირანის საზღვრებს საფრთხეს უქმნის, - განაცხადა სომხეთის თავდაცვის სამინისტროს წარმომადგენელმა, არცრუნ ოვანისიანმა.
სომხეთის თავდაცვის სამინისტროს წარმომადგენელმა კომენტარი გააკეთა გავრცელებულ ინფორმაციაზე, რომ ორი უპილოტო საფრენი აპარატი საქართველოს ტერიტორიაზე ჩამოვარდა.
„ინფორმაციას არ ვფლობ, თუმცა არაფრის გამორიცხვა შეიძლება. ირანისა და საქართველოს საზღვრები საფრთხის ქვეშ არის“, - განაცხადა სომხეთის თავდაცვის სამინისტროს წარმომადგენელმა.
საქართველოს შინაგან საქმეთა სამინისტროში განაცხადეს, რომ კახეთში, საგარეჯოს მუნიციპალიტეტის სოფელ უდაბნოსა და ყვარლის მუნიციპალიტეტის სოფელ სანავარდოს მიმდებარე ტერიტორიებზე უპილოტო საფრენი ორი აპარატი ჩამოვარდა. უწყების ინფორმაციით, მომხდარის შედეგად არავინ დაშავებულა. შინაგან საქმეთა სამინისტრომ დაუყოვნებლივ დაიწყო საგამოძიებო ღონისძიებები.