გუშინ პრაღაში პრემიერ-მინისტრის სპეციალური წარმომადგენლის, ზურაბ აბაშიძისა და რუსეთის საგარეო საქმეთა მინისტრის მოადგილის, გრიგორი კარასინის მორიგი შეხვედრა გაიმართა. შეხვედრის ერთ-ერთი თემა აფხაზეთის გავლით, რკინიგზის აღდგენა იყო, თუმცა როგორც აბაშიძემ აღნიშნა - "აფხაზეთის რკინიგზაზე ახალი არაფერი ყოფილა".
"ჩვენ ადრეც გვსმენია მათი აზრი, რომ თუ საქართველო დაინტერესებულია ამ რკინიგზის მონაკვეთის ამოქმედებით, ჩვენ უნდა მივმართოთ აფხაზებს და მათთან უნდა მოვილაპარაკოთ", - განაცხადა ზურაბ აბაშიძემ.
თქვენი აზრით, აფხაზეთის გავლით რკინიგზის ამოქმედება საქართველოს ეროვნულ ინტერესებს შეუქმნის თუ არა საფრთხეს? ამ კითხვით "რეზონანსმა" საზოგადოების წევრებს მიმართა.
გიორგი შენგელაია (რეჟისორი): "ამ შემთხვევაში საერთაშორისო მოვლენებს უნდა დავაკვირდეთ. რუსეთისა და უკრაინის კონფლიქტის დასრულებას უნდა დაველოდოთ. ხელაღებით ვერ ვიტყვით, ეს რკინიგზა გვინდა თუ არ გვინდა.
შეიძლება ისეთი დრო დადგეს, რომ ეს რკინიგზა დაგვჭირდეს, მაგრამ ახლა ასე პირდაპირ ვერაფერს ვიტყვით. თუმცა, რადგან კარასინი და აბაშიძე ამაზე ლაპარაკობენ ე.ი. რაღაცა ხდება, ზუსტად რა ხდება, ვერ ვიგებ, მაგრამ ვგრძნობ, რომ რაღაც ხდება.
თედო დუნდუა (ისტორიკოსი): "რკინიგზა ეკონომიკური კუთხით შეიძლება ქვეყნისთვის აუცილებელი იყოს, მაგრამ რკინიგზა არ უნდა გადიოდეს იმ ტერიტორიაზე, რომელიც რუსეთის მიერ ოკუპირებულია. ამ საკითხიდან როგორ შეიძლება გამოძრომა, არ ვიცი.
აფხაზეთის რკინიგზის რეანიმაცია რა საჭიროა, არ მესმის. შეიძლება ტვირთბრუნვა ბევრი იყოს, მაგრამ ეს ნიშნავს იმას, რომ რუსეთთან შეთანხმებით, რკინიგზა გაივლის ჩემს ტერიტორიაზე, რომელიც ოკუპირებულია რუსეთის მიერ. ეს რაღაც აბსურდია.
ჩვენ იძულებულები ვართ ვისაუბროთ რუსეთთან, რომელთანაც დიპლომატიური ურთიერთობა არ გაგვაჩნია, რადგან ჩვენი ტერიტორიების ნაწილი მათ მიერაა ოკუპირებული. რაც ახლა რუსეთთან ურთიერთობა დარიალის გზით გვაქვს, ესეც საკმარისია, მე მგონი, სხვა სახის ურთიერთობა საჭირო არ არის.
რუსები მეუბნებიან, რომ ამ რკინიგზასთან დაკავშირებით უნდა დაველაპარაკო აფხაზეთს, გამოდის, რომ მე აფხაზეთს მხარედ ვცნობ, ყველაზე ცუდი მომენტი ესაა. რუსები ეშმაკურად იქცევიან, მე როგორც კი აფხაზებს დაველაპარაკები, გამოდის, რომ აფხაზებს მხარედ ვცნობ, მე კი ნამდვილად არ ვცნობ აფხაზებს მხარედ, რადგან აფხაზეთი ჩვენთვის მხარე არ არის.
ლია მუხაშავრია (იურისტი): ვფიქრობ, რომ ნებისმიერი კომუნიკაცია მხოლოდ და მხოლოდ წაადგება საქართველოსა და აფხაზეთის სამომავლო ურთიერთობას. არ ვფიქრობ, რომ რკინიგზის აღდგენა რამე ზიანს მოგვიტანს. დღეს, როდესაც საქართველოს ეკონომიკას უჭირს, ამ მიმართულებით გადადგმული ნებისმიერი ნაბიჯი მხოლოდ პოზიტიურად მეჩვენება.
გიგა ნასარიძე (ა/ო "საქართველო არ იყიდება"): "საქართველოს ეროვნული ინეტრესებისთვის ეს პირდაპირი საფრთხეა. ეს საკითხი განსახილველადაც არ ღირს. აბაშიძე-კარასინის ფორმატი იმიტომაც არის საშიში, რომ მსგავს საკითხებზე მიდის ხოლმე საუბარი.
აფხაზეთის გავლით რკინიგზის აღდგენა საქართველოს ინტერესებს პირდაპირ ურტყამს, ეს საქართველოს მხრიდან აფხაზეთის დამოუკიდებლობის აღიარებააა და გასაპროტესტებელია ის ფაქტი, რომ მსგავსი ტიპის მოლაპარაკებები საქართველოს სახელით არ მიდიოდეს.
ვახტანგ ძაბირაძე (კონსტიტუციონალისტი): "რკინიგზის აღდგენა მარტო მატარებლის წასვლა-წამოსვლას არ ნიშნავს. ასე ცალსახად იმის თქმა, რომ ეს ცუდი, ან კარგი იქნება, არ შეიძლება. საკითხი ყველა კომპონენტში უნდა განიხილონ, ეს იქნება როგორც უსაფრთხოების კუთხით, ისე არაღიარების მხრივ, ამას გარდა, ყველაზე მაქსიმალური ზიანი რა შეიძლება მივიღოთ და რა - არა.
აღნიშნული საკითხი ორი კაცის ფორმატში ვერ გადაწყდება, იმიტომ, რომ მთელი რიგი პრობლემებია, რომელიც სხვა უწყებების ჩარევასა და ხედვის გაზიარებას მოითხოვს. მაგრამ ყველაფერზე უარის თქმა ასევე არასწორად მიმაჩნია.
როდესაც შენ ვიღაცას რაღაცაზე უარს ეუბნები, შენი უარი დასაბუთებული უნდა იყოს. ჩვენ ამ თემაზე საუბარი ან გვეშინია, რაც პირადად არასწორ მიდგომად მიმაჩნია, ან ზნეობრივი მომენტია, როდესაც ამ ადამიანთან საუბარი არ გვსურს. არ ვამბობ, რომ უნდა ვილაპარაკოთ, მაგრამ ყველა საკითხს ცივი გონებით უნდა მივუდგეთ.
სტატიების ნახვა შეგიძლიათ რუბრიკაში "ყველა სტატია"
ყველა ახალი ამბის ნახვა შეგიძლიათ ამ ბმულზე
საინტერესო ვიდეოები შეგიძლიათ იხილოთ რუბრიკაში "ყველა ვიდეო"
ბოლო ამბების ნახვა შეგიძლიათ ამ ბმულზე