ის გეგმა, რომ ოკუპირებული აფხაზეთის სეპარატისტული რეჟიმი 1 სექტემბრიდან გალის ქართულ სკოლებში ქართული ენის სწავლების რუსულით ჩანაცვლებას აპირებს, ერთი თვის წინ თავად დე ფაქტო პრეზიდენტის მიერ გალის მოსახლეობასთან შეხვედრისას საჯაროდ გაცხადდა, თუმცა საქართველოს ხელსუფლების მხრიდან რატომღაც დღემდე ამ საკითხზე რეაგირება არ მომხდარა. გუშინ კი განათლების მინისტრმა თამარ სანიკიძემ, ვიცე-პრემიერმა კახა კალაძემ და საპარლამენტო უმრავლესობის წევრმა ირაკლი სესიაშვილმა განაცხადეს, რომ რისკი არსებობს, მაგრამ ამ ეტაპზე გალში ქართული სწავლების აკრძალვასთან დაკავშირებით ინფორმაცია არ დასტურდება.