"მათ (ძმებ გაჩეჩილაძეებს) არ აინტერესებთ სხვა დამფუძნებლების აზრი და ძალისმიერი მეთოდებით მოქმედებენ. მედიაზე ძალისმიერი მოქმედება, არ მგონია, კარგი იყოს..." - აცხადებს "მაესტროს" დამფუძნებელი და 15%-იანი წილის მფლობელი მამუკა ღლონტი და დარწმუნებულია, რომ ტელეკომპანის გაკონტროლებისათვის "ოცნებამ" გაჩეჩილაძე გამოიყენა და მალე არხი პროსახელისუფლებო გახდება.

მისი განცხადებით, გაჩეჩილაძემ სულ ახლახან შეიძინა 30%, რომელიც ლეგიტიმურია, მაგრამ ლეგიტიმური არ არის ის 25%, რომელსაც გაჩეჩილაძე მანამდე ფლობდა, ამიტომაც მას სასამართლოში სარჩელი აქვს შეტანილი და სასამართლოს დასრულებას ელოდება.

"რეზონანსი": რა ხდება მაესტროში, რა პროცესებს ვადევნებთ თვალს?

მამუკა ღლონტი: ფაქტის კონსტატაცია გავაკეთო?

"რ": მმართველი ძალის წარმომადგენლებისაგან კეთდება შეფასება, რომ ეს არის მეწილეებს შორის წილების გადანაწილების თემა და სხვა არაფერი. თუმცა ოპოზიციიდან გაისმის ის, რომ "მაესტროში" პოლიტიკური გავლენის მოპოვებისთვის ბრძოლა მიმდინარეობს? ამ ორიდან რომელი ბრძოლაა მაესტროში?

მ.ა.: ნეტარ არიან მორწმუნენი... ვისაც სჯერა, რომ ქართულ რეიტინგულ ტელევიზიებში პოლიტიკური გავლენები არ არის, ან არ არის მცდელობა, რომ იყოს, მართლაც ნეტარ არიან. ეტყობა, ჩემგან განსხვავებით, ისინი ძალიან მშვიდი ცხოვრებით და ძალიან ბედნიერ ქვეყანაში ცხოვრობენ. ყველა დიდ ტელევიზიაში არის პოლიტიკური გავლენა, რაც ხან ზეწოლით გამოიხატება, ხან პრემიებით, ხან - ინვესტიციებით, ხან - დაფინანსებით.

"რ": ის, რომ გია გაჩეჩილაძე დამატებით 15-15%-ს ყიდულობდა, ეს თქვენთვის ცნობილი თუ იყო, ან რატომ გაყიდეს მფლობელებმა ეს წილები, მათი არგუმენტი თუ იცით?

მ.ა.: საკუთრების უფლება ეს ერთ-ერთი მთავარი ღირებულებაა, ამიტომ ვინც წილი გაყიდეს, მათთან პრეტენზია არ შეიძლება იყოს. რაც შეეხება ბატონ გაჩეჩილაძეს, მან შეიძინა 30% და ამ 30%-ს მე ლეგიტიმურად ვაღიარებ. თუმცა ლეგიტიმურად არ ვაღიარებ მის იმ 25%-ს, რაც მანამდე გააჩნდა.

არსებობს ნასყიდობის წინარე ხელშეკრულება, რომელიც მას ავალდებულებს, რომ შემდეგ გააფორმოს უკვე მთავარი ხელშეკრულება, რის მიხედვითაც მას თავისი წილები 4 ძველ დამფუძნებელზე უნდა გაესხვისებინა. ეს კი შემდეგ მან გადაიფიქრა. შეგიძლიათ მას ჰკითხოთ, რამ აიძულა ის, რომ ნასყიდობის წინარე ხელშეკრულება დაედო. შესაბამისად მე, როგორც ერთ-ერთი მეწილე, ბატონი გიას ხელში 25%-ს არ ვაღიარებ, ვაღიარებ მხოლოდ ახლად შეძენილ 30%-ს.

ერთი თვის წინ სარჩელი უკვე შევიტანე და ვნახოთ, სასამართლო როგორ დამთავრდება.

"რ": რატომ უნდა გადაენაწილებინა საკუთარი 25% მეწილეებისთვის ან მერე რატომ გადაიფიქრა?

მ.ა.: აი, ეს მსურს, რომ ჯერ მისგან მოვისმინო - რატომ გაუჩნდა მას სურვილი, გაეფორმებინა ნასყიდობის წინარე ხელშეკრულება და შემდგომ რატომ აღარ შეასრულა დანაპირები.

"რ": თქვენ არ იცით მიზეზი?

მ.ა.: მე ყველაფერი ვიცი და ძალიან ბევრი ვიცი, მაგრამ მაინტერესებს ჯერ მისგან მოვისმინო.

"რ": "ტვ 11"-ის სიხშირეზე "მაესტრო 24" იხსნება. რატომ გახდა ახალი არხის გახსნა აუცილებელი და თქვენ თუ იღებთ ამაში მონაწილეობას?

მ.ა.: ამ შემთხვევაში ამ ახალი კომპანიის არც მეწილე ვარ და არც დამფუძნებელი და ამ კომპანიაზე პასუხს ვერ გაგცემთ. საერთოდ, მე ტელევიზიიდან გაქცეული ვარ და ახლაც ძალიან მძიმედ გადამაქვს ეს ამბები იმიტომ, რომ ზუსტად ამ ამბებს გავექეცი და წელიწადზე მეტია საერთოდ ტელევიზიისკენ გახედვაც მეძნელება.

"რ": გაჩეჩილაძის ნაბიჯებს როგორ შეაფასებთ, მისი თქმით, ბაია გადაბაძის გაშვების მიზეზი არის "მაესტროს" რეიტინგის კლება, ტელევიზიის გაკოტრებაზე მის მიერ შეტანილი განცხადება და ფინანსური მდგომარეობა. ეს არგუმენტი თქვენთვის მისაღებია?

მ.ა.: ყველანაირ საკითხს შეიძლება სხვადასხვა მხრიდან შეხედო. თუ დავუშვებთ, რომ ბატონი გია მართალია და ამიტომ გადააყენა ბაია გადაბაძე, უნდა გავითვალისწინოთ ისიც, რომ ერთ თვეში შეიძლება სასამართლომ მას მართვის 25% სხვაზე გადააფორმებინოს, რაც იმას ნიშნავს, რომ ერთ თვეში ისევ მოუწევს ტელევიზიის დირექტორის შეცვლა. შედეგად კი აღმოჩნდება, რომ ტელევიზიამ ძალიან დიდი ზიანი მიიღო.

ტელევიზია უკვე იღებს ძალიან დიდ ზიანს და არ შეიძლება მისი დამფუძნებელი, რომელსაც სურს ტელევიზიის აღორძინება, საკუთარი ნებით აყენებდეს ტელეარხს ზიანს. როგორც ხედავთ, უკვე "მაესტრო 24" გაჩნდა, ალბათ თანამშრომლების ნაწილი იქით წავა. გაჩეჩილაძეს საერთოდ აქვს თუ არა შენობა, საიდანაც უნდა იმაუწყებლოს, ესეც არ ვიცი, რადგან შენობა მაკა ასათიანს ეკუთვნის.

საბოლოოდ თუკი ვინმე დაზიანდება, ეს მაყურებელი იქნება. ამაზე უნდა ეფიქრა ბატონ გიას. თუ ის წინააღმდეგი იყო იმის, რომ "მაესტრო" გაკოტრდა, წინააღმდეგი იყო იმის, რომ ბაია გადაბაძე არაკეთილსინდისიერად ახორციელებს საქმეს, არსებობს სასამართლო, სადაც საკუთარი სიმართლე უნდა დაამტკიცო. მაგრამ საქმე სწორედ ისაა, რომ სანამ არ მოიპოვა 30% და ასევე ის საეჭვო 25%, არ მოისურვა ამის გაკეთება და რადიკალური სვლები გააკეთა. თუმცა, ეს მისი ნებაა და ალბათ სასამართლო ყველაფერს თავის ადგილზე დააყენებს.

"რ": თქვენ არ გქონდათ ბაია გადაბაძესთან პრობლემა იმ საკითხზე, რაზეც გაჩეჩილაძე საუბრობს?

მ.ა.: არხის პირველი დამფუძნებელი მე ვარ, სხვები შემდეგ შემომიერთდნენ და თუკი ბრენდი დღეს ღირებული და პოპულარულია, ეს ჩემი პროექტების დამსახურებაა. ასეთი დაახლოებით 10 პროექტი მაქვს გაკეთებული, სხვა დამფუძნებლებს კი ერთიც არ გაუკეთებიათ. მინიმუმ იმას მაინც ვიმსახურებდი, რომ რაღაც კონსულტაცია გაევლოთ ჩემთან - ახლა გადაეყენებინათ ბაია, ლევანი დაენიშნათ თუ ვინ. პატივისცემის ამბავში კონსულტაციები მაინც ყოფილიყო?!

ასეთი რამ არ გაუვლიათ. შესამაბისად მათ არ აინტერესებთ სხვა დამფუძნებლების აზრი და ძალისმიერი მეთოდებით მოქმედებენ. მედიაზე ძალისმიერი მოქმედება არ მგონია კარგი იყოს.

"რ": გადაბაძის განცხადებით, მისთვის პრობლემაა და კითხვის ნიშნებს აჩენს ის, რომ "იმედის" არაოფიციალური მმართველი ირაკლი რუხაძე დებს ფულს კონკურენტ ტელევიზიაში. არის ეს თქვენთვის საეჭვო, ან თქვენთვის რა აჩენს კითხვის ნიშნებს?

მ.ა.: ბატონმა ირაკლიმ მინიმუმ მიაღწია იმას, რომ იმ თანხად, რაც გადაიხადა, ფაქტობრივად დაშლის პირას მიიყვანა კონკურენტი ტელევიზია. რაც შეეხება მის პოლიტიკურ ამბიციებს, ამის შესახებ მე ვერაფერს გეტყვით, თუმცა, შესაძლოა ეჭვი არსებობდეს.

ნგრევის პროცესის დაწყებას თვალყურს ყველა ვადევნებთ. ამ თემით აშშ-ის საელჩო დაინტერესდა. ეს ქვეყნის იმიჯისთვის არის ცუდი, პრემიერ-მინისტრი გაეხვია შარში, როდესაც ბატონმა გიამ თქვა - ჩემი ძმაკაციაო და სამუშაო საათებში მასთან მივიდა. ეს ქვეყნისთვისაც ცუდია და მედიისთვისაც.

"რ": თქვენ რა ეჭვები გაქვთ, "ოცნების" ხელისუფლების სურვილია, გააკონტროლოს ტელეარხი?

მ.ა.: არ არსებობს ხელისუფლება, რომელსაც მედიის გაკონტროლების სურვილი არ აქვს. ასეთი ხელისუფლება მსოფლიოში არ არსებობს და თუ "ოცნება" არის ისეთი ხელისუფლება, რომელსაც ასეთი სურვილი არ აქვს, მაშინ ჩვენ 23-ე საუკუნეში ვართ.

"რ": თქვენ მიგაჩნიათ, რომ ეს არა მარტო სურვილია, არამედ "ოცნებამ" გაჩეჩილაძეების ხელით მაესტროს გასაკონტროლებლად მოქმედებაც დაიწყო?

მ.ა.: რაც უკვე ვთქვი, იქიდან საკმაოდ საღი აზრის გამოტანა შეიძლება.

"რ": გჯერათ, რომ გაჩეჩილაძეების სურვილია არხი უფრო რეიტინგული გახდეს და მხოლოდ არარეიტინგულობა იყო მათი დღევანდელი ქცევის მიზეზი?

მ.ა.: ვენაცვალე სულში, ნეტა გააკეთონ კარგი ტელევიზია, მე მათ მხოლოდ წარმატებას ვუსურვებ, ოღონდ ლეგიტიმურად უნდა ჰქონდეთ ის 55%. დავა სასამართლოშია. როდესაც სასამართლოშია დავა, მინიმუმ კითხვის ნიშანი არსებობს მათი წილების რაოდენობაზე, თორემ ღმერთმა ხელი მოუმართოთ და ერთი კი არა, 10 ტელევიზია გააკეთონ.

"რ": ბოლო პერიოდში გაჩეჩილაძეებთან საუბარი თუ გქონიათ "მაესტროს" საკითხზე?

მ.ა.: არც ერთი დამფუძნებელი საქმის კურსში არ ვიყავით. ახლაც არ ვიცი, მომავალში რა პროგრამა აქვს და ა.შ. ეს მინიმუმ ძალიან უხერხულია, რომ "მაესტროს" დამფუძნებლების - მე და ეკა აკობიას მიმართ ელემენტარული პატივისცემა არ ჰქონდეთ. მე და ეკა აკობია ვიყავით ერთად შენობაში, როდესაც ეროსი კიწმარიშვილი გადმოძვრა ღობეზე. ჩვენ რომ არ შევსულიყავით იქ იმ დროს, საინტერესოა დღეს გასაყოფი საერთოდ რა იქნებოდა. ასეთ ადამიანებს, რომლებიც არც ერთ მხარეს არ ვიყავით ჩართული, იმის ღირსად არავინ გვთვლის, მომავლის გეგმები შეგვატყობინონ. შესაბამისად, ჩემთვის მათი დამოკიდებულება გასაგებია.

"რ": რითი დაიწყო მაკა ასათიანსა და გია გაჩეჩილაძეს შორის დაპირისპირება?

მ.ა.: "მაესტროს" დამფუძნებლების ნაწილს მიგვაჩნია, რომ გია გაჩეჩილაძეს 25% არალეგიტიმურად აქვს მითვისებული.

"რ": გაჩეჩილაძის მტკიცებით, დაპირისპირება გაკოტრების საქმის სასამართლოში შეტანის გამო დაიწყო...

მ.ა.: გაჩეჩილაძემ სულ ახლახან შეიძინა 30%. როდესაც სტუდია "მაესტრომ" გაკოტრებაზე შეიტანა განცხადება, გაჩეჩილაძე მხოლოდ იმ 25%-ის მფლობელი იყო, რომლის ლეგიტიმურობაში ჩვენ ყველას ეჭვი გვეპარება.

"რ": სასამართლოსგან რა მოლოდინი გაქვთ?

მ.ა.: არ ვიცით სასამართლო როდის გაიმართება. სიმართლის გარკვევას ველოდებით. თუ სასამართლოს ერთი ინსტანცია გაგვამტყუნებს, ჩვენ ბოლომდე წავალთ. თუკი ბოლო ინსტანციაც გაგვამტყუნებს, საშველი აღარ იქნება და დავას თავს დავანებებთ.

"რ": თქვით, რომ ერთი წელია, პროცესებს ჩამოშორდით. მიზეზი რა იყო, იყო ნიშნები, რომ "მაესტროში" პროცესები ჯანსაღად არ მიდიოდა?

მ.ა.: მთელი ჩემი ცხოვრება გასართობ გადაცემებს ვაკეთებდი. "ნაციონალურმა მოძრაობამ", რომლებიც მოძალადეები იყვნენ ამ სიტყვის სრული მნიშვნელობით, ჩვენი კომპანია გაკოტრებამდე მიიყვანა. შემდეგ იძულებულები გავხდით ჩავრთულიყავით პოლიტიკურ პროცესებში და ამდაგვარი ტელევიზია გაგვეკეთებინა. როგორც კი ეს მოძალადე "ნაციონალური მოძრაობა" წარსულს ჩაბარდა, ისეთი ტიპის ტელევიზია, როგორიც "მაესტრო" გახდა, საინტერესო არ იყო.

საერთოდ, მე გასართობი გადაცემების სპეციალისტი ვარ და მაყურებელიც ასე მიცნობს. შესაბამისად, აღარ მქონდა სურვილი ასეთი სახის ტელევიზიაში მემუშავა. მით უმეტეს იმ წინა წლებმა და სტრესებმა, რაც გადავიტანე, ჯანმრთელობის მხრივ ძალიან დიდი ზიანი მომიტანა. ამიტომ გავერიდე პროცესს, რომ ჩემთვის მშვიდად და წყნარად მეცხოვრა. საუბედუროდ, ეს არ გამომდის.

"რ": 2014 წლის დეკემბერში ტელეკომპანია 20-მდე თანამშრომელმა დატოვა, მათ შორის ნინო ჟიჟილაშვილმა და ვახო სანაიამ. ჟურნალისტები ამბობდნენ, რომ "არხი უნდა გახდეს იდეოლოგიზებული" და ამიტომაც ტელევიზიიდან წასვლა გადაწყვიტეს. რა ხდებოდა მაშინ და არის თუ არა დღევანდელი პროცესი 2014 წლის ამბების გაგრძელება?

მ.ა.: მე არც იმ პროცესებში ვიყავი ჩართული და არც დღევანდელ პროცესებში ვარ. შესაბამისად, პროცესის მონაწილეები უფრო სწორ პასუხს გაგცემთ, ვიდრე მე.

"რ": საუბარი იმაზე, რომ ადრე მაკა ასათიანის ქმრის გეგმა იყო "მაესტრო" პრორუსული არხი გამხდარიყო და ახლა გაჩეჩილაძის სურვილია არხი სახელისუფლებო გახდეს, რადგან ის პრემიერის მეგობარია. თქვენ რა აზრის ხართ ამაზე?

მ.ა.: ვინც ამას ამბობს, ისინი იმასაც ამბობენ, რომ ეს ხელისუფლება პრორუსულია. ამ ლოგიკით განსხვავებას ვერ ვხედავ. თუკი "მაესტროც" პრორუსულია და ხელისუფლებაც, გამოდის პრორუსულობაში არაფერი იცვლება. ამაში ვერანაირ ლოგიკას ვერ ვხედავ და ვერანაირ პასუხს ვერ გაგცემთ იმის გარდა, რაც გითხარით.

"რ": თუმცა, ეჭვი გაქვთ, რომ "მაესტრო" პროსახელისუფლებო გახდება.

მ.ა.: ეჭვი არ მაქვს, დარწმუნებული ვარ.

"რ": არის დღეს "მაესტროში" გუნდი, ვინც გაჩეჩილაძეს მხარს უჭერს?

მ.ა.: "მაესტროში" თანამშრომლების 80%-ს არ ვიცნობ და ვერაფერს გეტყვით.