"საერთაშორისო გამჭვირვალობა - საქართველოს" აღმასრულებელი დირექტორის, ეკა გიგაურის შეფასებით, საკონსტიტუციო სასამართლოს თავმჯდომარესა და მოსამართლეებზე ზეწოლა ხორციელდება. ამის შესახებ გიგაურმა "ინტერპრესნიუსს" საკონსტიტუციო სასამართლოს თავმჯდომარის, გიორგი პაპუაშვილის განცხადებაზე კომენტირებისას განუცხადა, რომელმაც ევროსასამართლოს მოსამართლეობის კანდიდატების შერჩევის პროცესს "პოლიტიკურად მოტივირებული" უწოდა.
მისივე თქმით, აბსოლუტურად დაუშვებელი და მიუღებელია ნებისმიერი ზეწოლა საკონსტიტუციო სასამართლოზე და სასამართლოს თავმჯდომარეზე, რაც შეიძლება მიზნად ისახავდეს იმას, რომ საკონსტიტუციო სასამართლომ შეცვალოს ან მიიღოს კონკრეტული გადაწყვეტილება.
"საკონსტიტუციო სასამართლოს მოსამართლეებზე განხორციელებული ზეწოლის ფაქტები დიდი ხანია ცნობილია ჩვენთვის, თუმცა მათი სურვილი იყო, რომ ამ კონკრეტულ ფაქტებზე არ გვესაუბრა, ვინაიდან თავადაც არ საუბრობენ ამაზე - მათთვის მიუღებელია საჯარო დისკუსიებში შევიდნენ მთავრობასთან ან იმ ადამიანებთან, რომლებმაც კონკრეტული რამ შეუთვალეს ან პირდაპირ ან არაპირდაპირ ზეწოლას ახორციელებენ.
"ზეწოლის მაგალითია ის, რაზეც დღეს საკონსტიტუციო სასამართლოს თავმჯდომარე საუბრობს. მგონია, რომ ამ ფაქტით უნდა დაინტერესდნენ საქართველოს პარლამენტის თავმჯდომარე, პრემიერ-მინისტრი და, სულ ცოტა, მოიკვლიონ, დაინტერესდნენ, თუ რა ხდება ამ კუთხით საკონსტიტუციო სასამართლოში," - აღნიშნა გიგაურმა.
ხორციელდება თუ არა საკონსტიტუციო სასამართლოს თავმჯდომარესა და მოსამართლეზე ზეწოლა? - ამ კითხვით "რეზონანსმა" საზოგადოების წარმომადგენლებს მიმართა.
იგორ კვესელავა (პოლიტოლოგი): ეკა გიგაურის განცხადება ამ შემთხვევაში მტკიცებულებად ვერ გამოდგება, რადგან ქალბატონი ეკა უკვე წლებია ასეთი შინაარსის განცხადებებს ყოველგვარი დამამტკიცებელი დოკუმენტაციის წარმოდგენის გარეშე აკეთებს. როდესაც არასამთავრობო ორგანიზაციის ერთ-ერთი ხელმძღვანელი ამაზე საუბრობს, აუცილებელია, მისი განცხადება დოკუმენტაციით იყოს გამყარებული. ჭორის დონეზე მარჩიელობა და თანაც რაღაც ზეგავლენის შესახებ საუბარი არაფრით არ შეიძლება. ამას მხოლოდ ცილისწამება შეგვიძლია ვუწოდოთ, რაც გამართლებული ნამდვილად არაა.
ედიშერ გვენეტაძე (ისტორიის მეცნიერებათა დოქტორი): არასამთავრობო ორგანიზაციების ნაკლებად მჯერა, რადგან ყველამ ძალიან კარგად ვიცით, რას წარმოადგენდა ეს ხალხი "ნაციონალური მოძრაობის" დროს. ამდენად, ისინი ყველანაირად ცდილობენ იმ მოსამართლეებისა და საკონსტიტუციო სასამართლოს თავმჯდომარის გათეთრებას, რომელიც გამოდის და მოსთქვამს, თუ რატომ არ აირჩიეს სტრასბურგის მოსამართლედ. ე.ი. მას მუდამ უნდა ამ თანამდებობის დაკავება და ოდნავი კრიტიკაც კი ვერ წარმოუდგენია. მოკლედ რომ გითხრათ, არამკითხე მოამბეების განცხადებების არ მჯერა.
თაკო ჩარკვიანი (პუბლიცისტი): არ ვიცი, ამას შეიძლება თუ არა ზეწოლა ვუწოდოთ, მაგრამ ერთი რამ შემიძლია გითხრათ: რასაც მოქალაქეები ლევან მურუსიძესთან დაკავშირებით ვისმენთ, ადამიანის შესახებ, რომელსაც მონაწილეობა საერთაშორისოდ გახმაურებულ საქმეში აქვს მიღებული და ამასთან, წინა ხელისუფლებაც გამოიარა, საზოგადოებას რჩება კითხვა, თუ რატომ ვერ ელევა ასეთ ოდიოზურ ფიგურას მთავრობა. ამ საკითხში გარკვეული ნამდვილად არ ვარ, მაგრამ ნამდვილად საკვირველია, თუ რატომ არ უგდებს ყურს ხელისუფლება საკუთარი ხალხის ხმას? შესაძლოა, სიტუაციის მართვა ამ სფეროში მართლაც ხდება, თუმცა გადაჭრით ამის თქმა რთული იქნება.
ვახტანგ ძაბირაძე (კონსტიტუციონალისტი): ჩემი აზრით, ასეთი ტიპის განცხადების დოკუმენტაციის წარდგენის გარეშე გაკეთება, მითუმეტეს ისეთი ორგანიზაციის მხრიდან, რომელსაც პრეტენზია დამოუკიდებელობასა და ლიდერობაზე აქვს, არ შეიძლება. დარწმუნებულია, რომ ეს ფაქტები სიმართლეს შეესაბამება? გარდა ამისა, მოსამართლე და მითუფრო საკონსტიტუციო სასამართლოს თავმჯდომარე, რომელსაც იმის უნარიც კი არ ყოფნის, რომ ზეწოლის შემთხვევაში ამაზე ღიად თავად ისაუბროს, ყოველთვის ზეწოლის მორჩილი იქნება. ის არ გახლავთ უბრალო მოქალაქე, არ შეიძლება, ასეთი რანგის საჯარო მოხელე ამაზე ჩუმად ლაპარაკობდეს და თანაც კონფიდენციალურობა შეინარჩუნოს. ამ ორგანიზაციასთან და თავად გიგაურთან არავითარი პრობლემა არ მაქვს, თუმცა როდესაც არასამთავრობო ორგანიზაცია ასეთ საკითხზე განცხადებას აკეთებს, შესაბამისი დოკუმენტაცია და ფაქტები უნდა წარმოადგინოს.
სტატიების ნახვა შეგიძლიათ რუბრიკაში "ყველა სტატია"
ყველა ახალი ამბის ნახვა შეგიძლიათ ამ ბმულზე
საინტერესო ვიდეოები შეგიძლიათ იხილოთ რუბრიკაში "ყველა ვიდეო"
ბოლო ამბების ნახვა შეგიძლიათ ამ ბმულზე