ევროპის სახელმწიფოების ანალოგიურად, უცხო ქვეყნის მოქალაქეები თავშესაფარს საქართველოშიც ეძებენ. დევნილთა და განსახლების სამინისტროს 2010-2015 წლებში ასეთი თხოვნით უკრაინის, ერაყის, სირიის და სხვა ქვეყნების 4695-მა მოქალაქემ მიმართა, საიდანაც ჰუმანიტარული და ლტოლვილის სტატუსი მხოლოდ 1273-მა პირმა მიიღო. როგორც სოზარ სუბარის უწყებაში აცხადებენ, ყველა დანარჩენის მოთხოვნა არ დაკმაყოფილდა და შესაბამისად, მათ ქვეყნის დატოვება მოუწიათ. ევროპაში კი, გაეროს მონაცემებით, მიგრანტთა რაოდენობამ შარშან ერთ მილიონს გადააჭარბა.