დევდორაკის ხეობაში მოვარდნილმა ღვარცოფმა და ზემო ლარსის საბაჟო-გამშვები პუნქტის ჩაკეტვამ რუსეთში, ქართულთან ერთად, პრობლემები სომხური პროდუქტის ექსპორტსაც შეუქმნა. სომეხმა ექსპორტიორებმა ალტერნატიული გზა უკვე ნახეს და საკუთარი ნაწარმი ბათუმიდან ნოვოროსიისკის პორტში ბორნით გადააქვთ. სხვადასხვა შემოვლითი გზით სარგებლობენ ქართველი მეწარმეებიც. რაც შეეხება თავად გზას, საქართველოს საავტომობილო გზების დეპარტამენტში ამბობენ, რომ ის დაახლოებით 2 კვირაში გაიხსნება.