ანალიტიკოსი გია ხუხაშვილი ამბობს, რომ საპარლამენტო არჩევნებზე შესაძლოა, მოსახლეობის დიდი ნაწილი არ მივიდეს. ეს კი, მისი აზრით, იმის მიზეზი შეიძლება გახდეს, რომ ქვეყანაში გარკვეულმა ძალებმა პოსტსაარჩევნო პერიოდში კირიზისული სიტუაცია შექმნან, რაშიც, გამორიცხული არ არის, რომ "ნაციონალურ მოძრაობასთან" ერთად, სხვა პოლიტიკურმა სუბიექტებმაც მიიღონ მონაწილეობა.

ხუხაშვილის განცხადებით, სწორედ ამის იმედი შეიძლება ჰქონდეს ყოფილ პრეზიდენტს მიხეილ სააკაშვილს, რომელიც ქვეყანაში დაბრუნებას აანონსებს.

ანალიტიკოსის თქმით, გამომდინარე იქიდან, რომ "ოცნება" შეცდომას შეცდომაზე უშვებს, დაინტერესებულ შიდა თუ გარე ძალებს იმის საშუალებას აძლევენ, რომ მოსახლეობის დახმარებით, ქვეყანაში გარკვეული სახის პოლიტიკური კრიზისი შექმნან.

"რეზონანსი": პრეზიდენტმა გიორგი მარგველაშვილმა გააკეთა განცხადება, რომ მიხეილ სააკაშვილი ქვეყანაში ვითარების დაძაბვას ცდილობს. როგორ ფიქრობთ, არჩევნების შემდეგ შესაძლოა, ქვეყანაში რევოლუციური სცენარი იგეგმებოდეს?

გია ხუხაშვილი: ჩვენ ერთი რამ უნდა ვიცოდეთ, რომ ქვეყანაში რევოლუციას თავის თავს მხოლოდ ხელისუფლება უწყობს - რევოლუცია ხალხის მხარდაჭერის გარეშე უბრალოდ არ არსებობს. ამის ფორმირება კი იმ შემთხვევაში ხდება, თუ ხელისუფლება შეცდომას უშვებს და მისი მოქალაქეების უკმაყოფილება კრიტიკულ ზღვარს აღწევს. ბუნებრივია, ამ განწყობებს ვიღაც სათავეში უდგება.

მე არ გამოვრიცხავ, რომ სააკაშვილს ასეთი გეგმები ჰქონდეს. გამომდინარე იქიდან, რომ "ოცნება" გამოუსწორებელ შეცდომებს უშვებს. ეს კი სააკაშვილს იმის იმედს აძლევს, რომ შეიძლება, პოსტსაარჩევნოდ რაღაცა კრიზისის ფორმირება მოახერხოს. ყველაზე ცუდი კი ის არის, რომ ნაციონალების გარდა ამაში მონაწილეობა სხვა პოლიტიკურმა სუბიექტებმაც მიიღონ.

გამომდინარე იქიდან, რომ "ნაციონალებმა" იციან, რომ ამ არჩევნებს ვერ მოიგებენ, მათ ამოცანას მხოლოდ "ოცნების" დამარცხება წარმოადგენს.

"რ": მარგველაშვილმა მოსახლეობას მოუწოდა, რომ 8 ოქტომბერს არჩევნებზე მივიდნენ. როგორ ფიქრობთ, არსებობს იმის საშიშროება, რომ საპარლამენტო არჩევნებზე ჩვენი მოქალაქეების დიდი ნაწილი არ მივიდეს?

გ.ხ: რა თქმა უნდა, ეს პრობლემა არსებობს. პოლიტიკური ელიტა იმდენად ღრმა კრიზისშია, რომ საქართველოს მოსახლეობის უმრავლესობას ღირსეული არჩევანის გაკეთების საშუალებას ვერ აძლევს. დღეს საშუალო სტატისტიკურ ამომრჩეველს, არც ერთი პარტია არ მოსწონს, გარკვეულწილად აპათიაშია.

ასეთი მდგომარეობა თუ გაგრძელდა, ჩვენ არჩევნებზე დაბალ აქტივობას მივიღებთ, რაც შეიძლება პოსტსაარჩევნო კრიზისის ფორმირების წინაპირობა გახდეს.

არჩევნებზე მაღალი აქტივობა, ერთადერთი უნივერსალური დარღვევაა, რათა პოსტსაარჩევნო პერიოდში კრიზისი არ განვითარდეს. საარჩევნო უბნებთან თუ რიგი დადგება, ვერც ადმინისტრაციული რესურსების გამოყენებას შეძლებენ და ვერც ოპოზიცია გამოთქვამს უკმაყოფილებას, რომ იქ რაღაც რიგზე ვერ იყო. ხალხის აქტიურობა, მთავარი დაზღვევაა.

"რ": რამდენიმე დღის წინ "ქართული ოცნების" მიერ წარდგენილ ახალ სახეებსა და მაჟორიტარების კანდიდატებზე რა შეფასებას გააკეთებთ. როგორ ფიქრობთ, "ოცნება" ამ შემადგენლობით, 95-კაციან მანდატს აიღებს?

გ.ხ.: "ქართულ ოცნებას" ამ კანდიდატების წარდგენით უნდოდა, რომ აქცენტი უფრო პროგრესულ და თანამედროვე ძალებზე გაეკეთებინა, რათა სუფთა წარსული და კარგი განათლების მქონე კანდიდატები ჰყოლოდა. ეს იყო მათი ძირითადი მოტივი.

ახალი სახეების მიმართ მე არანაირი პრეტენზია არ მაქვს, პირიქით, თავის ადგილებზე ყველა შეიძლება ძალიან წარმატებული ადამიანი არის. თუმცა, ერთია იყო კარგი პროფესიონალი და მეორე საკითხია საჯარო პოლიტიკა, რომლშიც მხოლოდ შენი განათლება და სამსახურში წარმატებული საქმიანობა არ კმარა.

საჯარო პოლიტიკა ნებისმიერი ადამიანის საკეთებელი საქმე არ არის. ამას შესაბამისი მომზადება სჭირდება. ეს არის ცნობადობის ფორმირება, დისკუსიებში მონაწილეობის პრაქტიკა, საჯარო სივრცესში კომუნიკაციის უნარი. ჩემი აზრით, ახალ სახეებს მთავარი პრობლემა და ხარვეზი სწორედ ამ მიმართულებით აქვთ. პოლიტტექნოლოგიურად ეს ამ ადამიანების ბრალი არ არის.

ეს არის "ოცნების" შეცდომა, რომლემაც ამ ადამიანების გადასროლა ისე მოახდინა, რომ მათი შესაბამისი მომზადება არ განახორციელა. ეს ადამიანებიც რისკის ქვეშ დააყენა და თავისი ამოცანის შესრულებაც ბუნდოვანი გახადა.

ამ ადამიანებს მინიმუმ, გამოცდილ პოლიტიკოსებთან დისკუსია გაუჭირდებათ და ყველა მათგანთან, მნიშვნელოვან საბრძოლო ასპარეზს წააგებენ. შესაბამისად, დავით კოღუაშვილის ბედს გაიზიარებენ. უბრალოდ ამას ვსაუბრობ, როგორც ამ ადამიანების გულშემატკივარი და არა როგორც მტერი.

"რ": თუმცა ახალ და პროგრესულად მოაზროვნე ახალგაზრდებთან ერთად, საზოგადოებამ ძველი და უკვე კარგად ნაცნობი ყოფილი შინაგან საქმეთა მინისტრი კობა ნარჩემაშვილიც მაჟორიტარ კანდიდატად იხილა. როგორ ფიქრობთ, რა დამსახურებისთვის ან რის გამო გადაწყვიტა "ოცნებამ", რომ ეს ადამიანი მათ სიაში ყოფილიყო?

გ.ხ: ახალი სახეებისგან განსხვავებით, ჩვენ "ოცნების" საპირისპირო გადაწყვეტილება, კობა ნარჩემაშვილის სახით ვიხილეთ. შორს ვარ იქიდან, რომ ნარჩემაშვილის პიროვნების დემონიზაცია მოხდეს, მაგრამ ის არ არის იმ დონის ფიგურა, რომ მასზე ან ცუდი ან კარგი ვილაპარაკოთ.

თუმცა არსებობს ფაქტები, რომლებსაც ვერ გავექცევით. შევარდნაძის ხელისუფლების დროს, ის იყო იმ სისტემის ხელმძღვანელი, რომლიც თავიდან ფეხებამდე კორუფციაში იყო ჩაფლული. შეიძლება თავად ამ კორუფციაში არ მონაწილეობდა, მაგრამ პოლიტიკურად გასვრილი იყო და მთავარი პასუხისმგებლობა მას ეკისრებოდა.

შეიძლება ვინმეს კითხვა გაუჩნდეს, რომ შევარდნაძის ხელისუფლებაში ყოფნა რა კომპრომატია? კომპრომატი არ არის, მაგრამ იმ ხელისუფლების დროს, ჩადენილ უკანონობასა და სხვა სახის ათას უბედურებაზე პასუხისმგებლობა ეკისრება.

თუ ვინმეს ჰგონია, რომ 2003 წლის "ვარდების" რევოლუცია მხოლოდ მიშას დამსახურებაა, ძალიან შემცდარა. ამაში ფაქტობრივად მთელი ხალხი იყო ჩართული. ადამიანებს იმ ყოფაში ყოფნა აღარ შეეძლოთ.

ვიღაცები ცდილობენ, რომ შევარდნაძის დროს მოღვაწე პოლიტიკოსები საერთოდ გაათეთრონ. ზოგიერთმა "ოცნების" ლიდერმა კობა ნარჩემაშვილი ფაქტობრივად გმირად გამოაცხადა.

"რ": რას იტყვით გიორგი კვირიკაშვილის განცახდებაზე, რომ კობა ნარჩემაშვილი არის მაგალითი, თუ როგორ უნდა ააცილო ქვეყანას განსაცდელი. მის კანდიდატურას ხალხი ხმას ამის გამო მისცემს?

გ.ხ: ნარჩემაშვილი იმ პერიოდში არ იყო იმ დონის პოლიტიკური ფიგურა, რომ რამე სერიოზული გადაწყვეტილება ან ქმედება ჩაედინა. ის ვერც ვერაფერს გააკეთებდა და ვერც ვერაფერს დააშავებდა. მე იმ პროცესების მონაწილე ვარ და ვამბობ, რომ ნარჩემაშვილის ან გმირად ან დამნაშავედ გამოყვანა, ორივე შემთხვევაში დიდი სისულელეა.

მის სიტყვას მაშინ არანაირი ფასი არ ჰქონდა. ამიტომაც კვირიკაშვილის განცხადება ჩემთვის ძალიან გასაკვირი იყო. მან არ იცის, სინამდვილეში ნარჩემაშვილს რა შეეძლო და რისი გადაწყვეტილების მიღების უნარი ჰქონდა. ჩემი აზრით, პრემიერი ვიღაცამ შეცდომაში შეიყვანა და სისულელე ათქმევინა ან თავად შეგნებულად ცდილობს, რომ ნარჩემაშვილი შეალამაზოს.

ყველა პოლიტიკოსს მათ, შორის პრემიერსაც, ვთხოვ, რომ ერთი მარტივი რამ ახსოვდეთ, ხალხს ამნეზია არ სჭირს და ყველამ კარგად ვიცით, ვინ ვინ არის. ამიტომ ეს არის ყველა პოლიტიკოსის ფატალური შეცდომა. ჰგონიათ, მათ სიტყვას უფრო მეტი წონა აქვს, ვიდრე წარსულს, რომლიც ხალხს ძალიან კარგად ახსოვს.

კვირიკაშვილი წესიერი კაცია და მინდა ვურჩიო, რომ მეორედ ასეთი რამ აღარ გააკეთოს, სანამ ბოლომდე არ გაერკვევა, ვისზე ლაპარაკობს.