"როგორც ჩანს, "ნაციონალური მოძრაობის და "ქართული ოცნების" ინტერესშია, რომ პარლამენტში მესამე ძალა არ გავიდეს. შესაბამისად, ორივე ძალას ხელს აძლევს ის, რაც ხდება ბურჭულაძის კოალიაციაში და არა მარტო მანდ - ზოგადად მთელი ოპოზიციის გარშემო", - ამბობს "რეზონანსთან" საუბრისას ანალიტიკოსი ვახტანგ ძაბირაძე და ამით ივანიშვილის შესაძლო სტრატეგიაზე საუბრობს.

"რესპუბლიკელებისა" და ივანიშვილის დაპირისპირებაზე და  პაატა ბურჭულაძის კოალიაციის გარშემო განვითარებულ მოვლენებზე "რეზონანსი" ვახტანგ ძაბირაძეს ესაუბრა.

ვახტანგ ძაბირაძე: ივანიშვილისა და უსუფაშვილის დაპირისპირებაში არის უკვე ნდობის საკითხი - ვინ ვის ენდობა.  უსუფაშვილს ვიცნობ ძალიან კარგად. მოვუსმინე მის გამოსვლას. მან საკმაოდ საინტერესოდ ისაუბრა. თქვა, რომ შეიძლება არ ვიცოდე, როგორ შევინარჩუნო აქციების ფასი და ბიზნესიო, თუმცა, ჩემი სიტყვის ფასი ვიციო. ასე რომ, არ მგონია, უსუფაშვილს რამეში სჭირდებოდეს ტყუილი იმის შესახებ, რომ ივანიშვილმა მას პრემიერობა შესთავაზა. 

არ ვიცი, მათ შორის რა მოხდა, თუმცა არანაირი საფუძველი არ მაქვს, მას არ დავუჯერო. არ მესმის რაში სჭირდება ივანიშვილს სხვაგვარი ინტერპრეტირება. ყველასთვის ცნობილია, რომ მას უსუფაშვილთან მშვენიერი დამოკიდებულება ჰქონდა და აღიარებდა, რომ ეს არის ერთ-ერთი საუკეთესო პოლიტიკოსი მის გუნდში.

"რეზონანსი": ზოგადად ივანიშვილის და "რესპუბლიკელების"  დაპირისპირებაზე რას ფიქრობთ?

ვ.ძ.: მგონია, რომ იგი განაწყენებული უფროა "რესპუბლიკელებზე", ვიდრე მას რაღაც ობიექტური საფუძვლები ან ფაქტები ჰქონდეს. ივანიშვილი თვლიდა, რომ კოალიაციაში უნდა იყოს ერთი აზრი და როგორც ჩანს, წინააღმდეგობა წამოვიდა "რესპუბლიკელებიდან", რაც მისთვის მიუღებელია.

ივანიშვილმა ბიზნესი კარგად იცის, თუმცა პოლიტიკაში ყველაფერი სხვაგვარადაა, აქ სხვა კანონები მოქმედებს. ივანიშვილს უნდა ქვეყანა ისევე იმართებოდეს, როგორც ბიზნესი. ეს კი ორი სხვადასხვა რამეა და ასე მარტივად არ ხერხდება პარტიის და პოლიტიკის ერთნაირად მართვა.

"რ": თქვენი აზრით, რამდენად მოსალოდნელია წინასაარჩევნოდ დესტაბილიზაცია, ამაზე განცხადება პრემიერმა და შს მინისტრმაც გააკეთეს.

ვ.ძ.: მარტივი სიტუაცია, საქართველოში არეულობა აწყობს ორ ძალას - "ნაციონალურ მოძრაობას" და "ქართულ ოცნებას". მათ უნდათ, რამენაირად საფრთხის მოლოდინი გააჩინონ მოსახლეობაში, რომ ხალხი მიიყვანონ არჩევნებზე, რაც შეიძლება მეტიო ამომრჩეველი, რომ მომავალი პარლამენტი იყოს ორ სუბიექტიანი, სადაც შევლენ "ნაციონალები" და "ოცნება". როგორც ჩანს, მმართველი პარტიის ანალიტიკოსებმა ჩათვალეს, რომ ასეთ ვითარებაში უფრო გაუადვილდებათ ქვეყნის მართვა.

სამწუხაროდ, ყველაფერს მივყავართ არასწორი მიმართულებით. თუ მივიღებთ ორპარტიან პარლამენტს, დიდი ალბათობით, 2020 წელს ისევ მივიღებთ წინასაარჩევნო რევოლუციურ ვითარებას, როგორც ეს იყო 2012 წელს, 2008 და 2003 წლებში.

"რ": ანუ, წელს, თქვენი აზრით, არჩევნები მშვიდად ჩაივლის?

ვ.ძ.: საზოგადოებაში არანაირი ხისტი განწყობა, დაპირისპირება აღარ არის, რაც იყო 2012 წელს. ჩნდება კითხვა - თუ ასეთი ბაზა თავად მოსახლეობაში არ არის, რა არეულობაზე შეიძლება იყოს საუბარი?! აქედან გამომდინარე, არანაირი არეულობა არ იქნება.

რაც უნდა დაგეგმონ, თუ ბაზა არ იქნა, ამას ვერ გააკეთებენ. თუ სახელმწიფო გადატრიალებზეა საუბარი, როდესაც ჯარმა უნდა მიიღოს მონაწილეობა, მაშინ ეს სხვა საკითხია.

2012 წელს არჩევნების სხვაგვარი შედეგი რომ დადებულიყო, მთელი საქართველო ქუჩაში გამოვიდოდა. დღეს კი ქვეყანაში არჩევნები რომ ახლოვდება, საერთოდ არ იგრძნობა. ამიტომ ახლა არეულობაზე ლაპარაკი ზედმეტია.

დესტაბილიზაცია სახიფათო და მოსალოდნელი მაშინ არის, როცა მოსახლეობა მხარს უჭერს. ეს უკვე ბაზაა და, როცა ეს არ არის, მაშინ არეულობა არ გამოვა.

"ნაციონალურმა მოძრაობამ" 4 წლის განმავლობაში ძალიან ბევრჯერ სცადა რუსთაველზე აქციების აგორება სხვადასხვა მოტივით, თუმცა ვერ გააკეთა, რადგან მას მოსახლეობაში მხარდაჭერა არ აქვს.

"რ": კორცხელის მსგავსი ინციდენტების განმეორეობის საფრთხე თუ არსებობს?

ვ.ძ.: კორცხელის მსგავსი ინციდენტები შეიძლება მოხდეს, მაგრამ ეს აბსოლუტურად არაფერს არ ნიშნავს. ყველა ქვეყანაში ხდება ასეთი ფაქტი.

აგერ, კარს მოგვადგა არჩევნები და ჯერჯერობით ასეთი ინციდენტები არ ჩანს. შეიძლება ვიღაცას თავში უტრიალებს ამის გაკეთება, მაგრამ რეალიზების ბაზა არ არსებობს.

"რ": "თავისუფალი დემოკრატების" 270-მა წევრმა ორი დღის წინ პარტია დატოვა. მსგავს სიტუაციაში აღმოჩნდა ცოტა ხნის წინ ბურჭულაძის პარტიაც. თქვენი აზრით, ოპოზიციაში ასე მასობრივი გადაადგილება-გადმოადგილება რასთან არის დაკავშირებული?

ვ.ძ.: ეს ქართული პოლიტიკის ჩვეულებრივი თანმდევი პროცესია. როგორც ჩანს, მიიღეს უკეთესი შემოთავაზებები.

დღეს რომ ვთქვათ სახელმწიფოში რეპრესიული აპარატი მუშაობს-თქო, ასე არ არის, ასეთი რამ არ ჩანს. რეპრესიას უნდა მომზადება, მანქანა უნდა იყოს აწყობილი, ხელისუფლებას კი ასეთი მანქანა ნამდვილად არ ჰყავს.

უფრო მარტივადა საქმე - ზეწოლაზე კი არა შეთავაზებაზეა საუბარი. ადამიანები აკეთებენ არჩევანს იმის მიხედვით, ვინ რას სთავაზობს.

"რ": თუმცა ამან გარკვეული თვალსაზრისით მასობრივი ხასიათი მიიღო...

ვ.ძ.: ბურჭულაძესთან დაკავშირებით ვითარება სხვაგვარადაა. ის, რაც ხდება იმ კოალიაციაში, ორივე ძალას - "ნაციონალურ მოძრაობასაც" და "ქართულ ოცნებსაც" აწყობს. ორივე ცდილობს დაიბრუნოს თავის ხმები. ასეთი ფაქტები იქნება იმიტომ, რომ ქვეყანაში არაფერი არ არის მოწესრიგებული.

ზოგადად კი გადაბირებები, მოწინაღმდეგე პარტიის წევრის გადმოყვანა მიღებული და გავრცელებულია. ამაში რაიმე კრიმინალი არ არის.

პრობლემა ჩნდება მაშინ, თუ ხდება დაშანტაჟება. არ მგონია, ამდენი ადამიანის დაშანტაჟება სახელმწიფომ მოახერხოს. ამიტომ მგონია, რომ ცალკეული შემთხვევები იქნება და ამას გამოიყენებენ პიარისთვისაც.

3 დღის წინ თავად ივანიშვილი ამბობდა, როგორ ცდილობდა დავით ბაქრაძის გადმობირებას. რა თქმა უნდა, ასეთი რაღაც გაგრძელდება და იქნება ყოველთვის. თუ პარტიას არ ჰყავს ისეთი ჯგუფი, რომელიც მყარადაა ჩამოყალიბებული თავის პოზიციაში, რა თქმა უნდა, მოხდება ასეთი ფაქტები. 

პრობლემა ჩნდება მაშინ, როდესაც სახელმწიფო იწყებს სხვა პარტიების წევრებისა და პოლიტიკური ფიგურების დატერორებას.  ასეთი ტერორი დღეს საქართველოში ნამდვილად არ არის.

"რ": რას ფიქრობთ ბურჭულაძის და გვარამიას საუბრის ფარულ ჩანაწერზე, თქვენი აზრით, ქვეყანაში ფარული მოსმენები გრძელდება?

ვ.ძ.: კიდევ ერთხელ გავიმეორებ - ამ ჩანაწერის გამოქვეყნება ხელს აძლევს როგორც "ქართულ ოცნებას", ისე "ნაციონალურ მოძრაობას".

ბურჭულაძის ელექტორატი შედგება 2 კატეგორიის ამომრჩევლისგან: პირველი, რომელიც წამოჰყვა გირჩს, ვაშაძეს და სხვას; მეორე კატეგორია - ეს არის ის ამომრჩეველი, რომელმაც "ქართული ოცნებისგან" ვერ მიიღო ის, რასაც ელოდა. მოკლედ, იმედგაცრუებულია "ოცნებისგან" და ეძებს ახალ ძალას.

ასე რომ, თუ "ქართულ ოცნებას" უნდა, რომ პარლამენტში ჰქონდეს იმდენი მანდატი, რასაც ამბობს ივანიშვილი, ეს იმას ნიშნავს, რომ პროპორციული სია ორად უნდა გაიყოს, ანუ, მესამე პარტია იქ ვერ უნდა მოხვდეს.

ამ ჩანაწერით "გირჩის" და ვაშაძის მხარდამჭერებს ეუბნებიან, რომ პარტიას ივანიშვილი აფინანსებს და ესენი იმათკენ მიდიან და ცხადია, ეს ამომრჩეველი უკვე შორდება "გირჩს". "ქართული ოცნების" ამომრჩეველს კი, რომელსაც ჰგონია, რომ ბურჭულაძე "ნაციონალი" არ არის, ეუბნებიან, რომ - კი, არის. ანუ, დარტყმა არის ერთი მხრიდანაც და მეორე მხრიდანაც.

შეთქმულებას არ ვგულისხმობ, მაგრამ, როგორც ჩანს, ამ ორი ძალის ინტერესშია მესამე ძალა პარლამენტში არ გავიდეს. შესაბამისად, ორივე ძალას აწყობს ის, რაც ხდება ბურჭულაძის და არა მარტო მისი - ზოგადად მთელი ოპოზიციის გარშემო.

დაახლოებით ეს სტრატეგიაა, რასაც ლაპარაკობს ივანიშვილი ამ შეხვედრებზე. 

სხვათა შორის მას პარტიებზე უნდოდა ლაპარაკის დაწყება აჭარის ჟურნალისტებთან შეხვედრის დროს და რამდენჯერმე გაიმეორა - რატომ არ მეკითხებითო და ბოლოს ვიღაცამ ჰკითხა. ივანიშვილის თქმით, ორი-სამი პარტია მეც მინდა, რომ იყოს, მაგრამ არ არისო. ანუ, ამბობს იმას, რომ სხვა ძალა არ არის.

"რ": თუმცა არ ცდილობს "პატრიოტა ალიანსის" ჩაძირვას და ეს არ მოიაზრება "მესამე ძალად"?

ვ.ძ.: არის თუ არა ეს კოალიაცია მესამე ძალა, არავინ იცის. მე ვსაუბრობ, თუ რა სცენარით ვითარდება არჩევნები, თორემ რა იქნება არავინ არ იცის.

"რ": და თქვენი აზრით, ეს ორმხრივი შეტევა როგორ იმოქმედებს ბურჭულაძის რეიტინგზე?

ვ.ძ.: მესამე ე.წ ოპოზიციური ძალის სტატუსის მოპოვება ძალიან გაუჭირდებათ, საკმაოდ მასირებული შტურმი იყო. ფაქტობრივად ამ გუნდს ჰქონდა შანსი, ბარიერი გადაელახა, მაგრამ ახლა იმდენი ადამიანი დაკარგა, რომ მე მგონი, საფუძვლიანად შეერყა ვითარება.

"რ": 8 ოქტომბრის საპარლამენტო არჩევნების ეგზიტპოლებს ორი კერძო კომპანია გამოაქვეყნებს. რომელზედაც უკვე არსებობს ვარაუდი, რომ მკვეთრად განსხვავებული მონაცემები დაიდება. თქვენი აზრით, ეს "ეგზიტპოლების ომი" გამოიწვევს თუ არა გარკვეულ ვნებათაღელვას?

ვ.ძ.: არჩევნების დღეს არაფერი მოხდება, რაც შეეხება მეორე დღეს - რა მოგახსენოთ... მე მგონი, ორივე დადებს ერთმანეთის საწინააღმდეგო რეზულტატს, მაგრამ ამაზე იმდენი ლაპარაკი იქნება არჩევნებამდე, რომ ისევ და ისევ პარტიის აქტივისტები თუ გამოვლენ და თუ დასცხებენ ქუჩაში, თორემ სხვა, არ მგონია, ამან რამე შედეგი მოიტანოს.

4 ტელევიზიის მიერ ერთად ჩატარებული ეგზიტპოლი არის კონტრსვლა იმაზე, რის გაკეთებას გეგმავდა და აკეთებდა "ნაციონალური მოძრაობა" - მარტო თვითონ ჩაატარებდა ეგზიტპოლებს და სივრცე იქნებოდა მხოლოდ მასზე. ამიტომ "ქართულმა ოცნებამ" გადადგა შემხვედრი ნაბიჯი და ატარებენ ეგიზიტპოლებს.

ახლა ორივე რომ გამოქვეყნდება, ვისაც ვისი სჯერა, იმას დაუჯერებს. ამიტომ აქ აჟიოტაჟი არ იქნება. შემდეგ გამოქვეყნდება არჩევნების შედეგებიც და ვნახავთ, რომელი ეგზიტპოლი უფრო ახლოს იდგა რეალობასთან.

დაპირისპირებას და ამისთვის მოსახლეობის ქუჩაში გამოყვანას, რა თქმა უნდა, არ ველოდები.

"რ": უკრაინისთვის, საქართველოსა და კოსოვოსთვის ვიზალიბერალიზაციის დაწესების საკითხზე 11 ოქტომბერს ევროკავშირის საბჭოში იმსჯელებენ. რა მოლოდინი გაქვთ ამასთან დაკავშირებით?

ვ.ძ.: დიდი ალბათობით ყველაფერი იქნება კარგად და მივიღებთ ვიზალიბერალიზაციას. ფაქტობრივად, დარწმუნებული ვარ ამაში, ჩემი აზრით, ეს საკითხი თითქმის გადაწყვეტილია.