აფხაზეთსა და ცხინვალის რეგიონში მომხდარი კონფლიქტის ექო ყველაზე ცხადად და შემზარავად იმ კომპაქტურ ჩასახლებებში ჩანს, სადაც იძულებით გადაადგილებულები ცხოვრობენ. უკვე 23 წელია, რაც მათი ნაწილი ყოფილი სკოლების, სასტუმროებისა თუ სასწავლებლების ტერიტორიაზე კომპაქტურად არის შესახლებული. როგორც წესი, აქ საცხოვრებელი პირობები აუტანელია. ბოლო რამდენიმე წელია, რაც დევნილთათვის ხელისუფლებისა და უცხოელი დონორების მეშვეობთ, საქართველოს სხვადასხვა ქალაქებში სპეციალური დასახლებების აშენება დაიწყო. თუმცა ბენეფიციარების საცხოვრებელი ფართით უზრუნველყოფა მხოლოდ საკითხის ნაწილობრივი მოგვარებაა. სამწუხაროდ, ბოლომდე ეს ვერც წინა და ვერც ამჟამინდელმა ხელისუფლებამ ვერ გააცნობიერა. შესაბამისად, დევნილთა ახალაშენებულ თუ რეაბილიტირებულ ჩასახლებებში მცხოვრებნი ახალი პრობლემების წინაშე აღმოჩნდნენ.