"ნაციონალებთან", რომლებიც თვლიდნენ, რომ ჩვენ აგენტები ვიყავით, სახელმწიფო გადატრიალებას ვაწყობდით და რუსეთისთვის გვინდოდა ქვეყნის ჩაბარება, მათთან თანამშრომლობა წარმოუდგენელია," - აცხადებს "რესპუბლიკელი" დავით ზურაბიშვილი, რომლის თქმითაც, სააკაშვილის გუნდშიც და გამიჯნულებშიც არიან ის ადამიანები, რომლებიც წინა ხელისუფლების სისტემის შემოქმედები იყვნენ და ორივე მხარეს ეკისრება როგორც დადებითი, ისე უარყოფითზე პასუხისმგებლობა.
დავით ზურაბიშვილი: უთანხმოება რომ იყო, ეს ჩანდა. ასევე ჩანს ის, რომ ერთმანეთი ძალიან "შეამკეს". ურთიერთობის საკმაოდ მძიმე ფორმა აარჩია ორივე მხარემ. დანარჩენი ვნახოთ, ვინ როგორ ჩამოყალიბდება.
ჯერჯერობით ეს არის ერთი სულისკვეთების ორი პარტია, რომლებიც ტაქტიკურ საკითხებზე ვერ შეთანხმდნენ, ანუ იმაზე, პარლამენტში შესვლა სჯობს თუ არა და ვინ უნდა იყოს თავმჯდომარე. სხვა არსებითი სხვაობა იყო თუ არა, ეს შემდგომ პროცესში გამოჩნდება.
"რეზონანსი": სააკაშვილის გუნდი ბოკერია-უგულავას გუნდს ივანიშვილის პროექტს უწოდებს და უგულავას გათავისუფლებასაც ამ გარიგებას უკავშირებს. თქვენი აზრით, უგულავას გაშვება ეს სასამართლოს დამოუკიდებლობის მანიშნებელია, თუ ივანიშვილთან გარიგების შედეგი?
დ.ზ.: არც ის მჯერა, რომ სასამართლო დამოუკიდებელია, რომ ეს გაშვება მთლიანად სასამართლოს პრეროგატივა იყო და არ იყო ზემოდან ჩარევა და არც ის მჯერა, რომ შეკრულები იყვნენ და გარიგებას ჰქონდა ადგილი. უბრალოდ, რაღაც მომენტები დაემთხვა.
ხელისუფლებისთვის უგულავას ციხეში გაჩერება ხელსაყრელი არ იყო. მას შემოდგომაზე მაინც უწევდა ვადამდე ადრე გათავისუფლების მოთხოვნა და იმაზეც თუ უარს ეტყოდნენ, ეს ძალიან გამოკვეთილად მინუსი იქნებოდა მთელი მსოფლიო საზოგადოების თვალში. ამიტომაც ახლა არჩიეს გამოშვება. მით უმეტეს, როდესაც "ნაციონალურ მოძრაობაში" ეს წინაღმდეგობაც იყო და ის, რომ ცეცხლს რომ ნავთს დაასხამ, ამ მომენტმაც ითამაშა გარკვეული როლი.
"რ": "ნაციონალური მოძრაობა" ნომერ პირველ ოპოზიციურ პარტიად მიიჩნეოდა და ახლა, ამ გაყოფით "ნაციონალური მოძრაობა" ინარჩუნებს ამ როლს, თუ ბკერია-უგულავას "ევროპული საქართველო"?
დ.ზ.: რეალურად, გამიჯნულებს პარლამენტში დიდი ფრაქცია ეყოლებათ, ალბათ ორიც. სააკაშვილის დარჩენილ ჯგუფს ჯერ არ ვიცით ფრაქცია ექნებათ თუ არა. ამიტომაც დღეს ვერავინ იტყვის ვინაა ნომერ პირველი ოპოზიცია, ვინ მეორე და ვინ - მესამე.
მგონია, რომ ოპოზიციური ფლანგის კიდევ ერთი "დათვალიერება" თვითმმართველობის არჩევნებზე შედგება და მაშინ გამოხტება წამყვანი ოპოზიცია ვინ არის.
"რ": შესაძლოა თუ არა "რესპუბლიკელები" გიხილოთ ბოკერია-უგულავას გუნდთან რაიმე ალიანსში, მაგალითად საარჩევნო ბლოკში?
დ.ზ.: კონკრეტულ თემებზე ურთიერთობა ყველასთან გვექნება, ამ ორივ ჯგუფთანაც, "ოცნებასთანაც". პარლამენტში ყოფნისასაც გვქონდა "ნაცმოძრაობასთან" ურთიერთობა.
ჩვენ სტრატეგიულ პარტნიორად ჯერჯერობით მხოლოდ ერთი პარტია გვყავს, ესაა "თავისუფალი დეომოკრატები". ისინი ჩვენი ძველი პარტნიორები არიან, ხან ერთად ვართ, ხან - ცალკე. დანარჩენებთან კი მხოლოდ კონკრეტული თემების მიხედვით.
"რ": თქვენი აზრით, "ნაციონალური მოძრაობის" მმართველობის დროს არსებულ დანაშაულებებზე პასუხისმგებლობა რომელ გუნდს რჩება?
დ.ზ.: "ნაციონალური მოძრაობას" მმართველობისას პლუსიც ჰქონდათ და სისტემური მინუსიც ძალიან დიდი, მაგრამ ის, რომ ვიღაცამ კარგი წაიღოს და ცუდი სხვას დაუტოვოს, ასე არ გამოვა. ორივე მხარეს ეკისრება როგორც დადებითი, ისე უარყოფითზე პასუხისმგებლობა. როგორც ერთ მხარეს არის თვითონ სააკაშვილი და მისი მიმდევრები, ასევე გამიჯნულებში არის არაერთი ისეთი ადამიანი, ვინც იმ სისტემის შემოქმედი იყო, გადაწვეტილების მიმღები და არა რიგითი შემსრულებელი. ეს ვის როგორ აქვს გაცნობიერებული, ამას მომავალი გვანახებს.
"რ": კონკრეტულად რომელი პოლიტიკოსია "რესპუბლიკელებისთვის" მიუღებელი გამიჯნულებიდან?
დ.ზ.: ჩვენ კონკრეტულ ადამიანებს არ ვებრძოდით. ჩვენ ვებრძოდით მთელ იმ სისტემას, რომელიც ამ ადამიანებმა შექმნეს, რომელიც იყო ძალადობრივი სისტემა, რომელიც გულისხმობდა მედიის, სასამართლოს, ბიზნესის დაქვემდებარებას სახელმწიფოზე, ადამიანების თვალთვალს, პოლიტიკური ნიშნის მიხედვით დევნას.
კონკრეტულად არავის არ ვერჩით არც ახლა. ჩვენი კრიტიკაც დღეს არის სისტემის კრიტიკა და მმართველობის იმ ფორმის და მოდელის კრიტიკა, რაც "ოცნებამ" და ბიძინა ივანიშვილმა დაამკვიდრა.
"რ": დღევანდელისგან განსხვავებით, "ნაციონალების" დროს თქვენი პარტიის ზოგიერთი წევრი მოღალატედ და აგენტადაც კი იყო გამოცხადებული და მათთან თუნდაც თემატური თანაშრომლობა მაინც შესაძლებელია გქონდეთ?
დ.ზ.: "ნაციონალებთან", რომლებიც თვლიდნენ, რომ ჩვენ აგენტები ვიყავით, სახელმწიფო გადატრიალებას ვაწყობდით და რუსეთისთვის გვინდოდა ქვეყნის ჩაბარება, მათთან თანამშრომლობა წარმოუდგენელია. ხოლო თემატიკა ისეთი რაღაცააა, რომ შესაძლოა ერთ თემაში თანმხვედრ პოზიციაზე "პატრიოტთა ალიანსთანაც" აღმოვჩნდეთ, რომელიც ჩვენგან იდეოლოგიურად სრულიად განსხვავებული და დაპირისპირებულია.
სტალინი და ჩერჩილი რომ ელაპარაკებოდნენ ერთმანეთს ჰიტლერის წინააღმდეგ, ერთმანეთი კი არ უყვარდათ. ასე რომ, ყველაფერი ხდება ხოლმე, მაგრამ სიღრმისეული სტრატეგიული თანამშრომლობისათვის სერიოზული ღირებულებითი თანხვედრა უნდა იყოს და ერთმანეთს მტრად და აგენტად არ უნდა თვლიდე, თუნდაც წარსულში.