ამერიკის შეერთებულ შტატებში, ჯორჯიასა და მისისიპში ტორნადომ მსხვერპლი გამოიწვია. ამის შესახებ ინფორმაციას, „BBC" ავრცელებს.

საგანგებო მდგომარეობის სამსახურის ინფორმაციით, ჯორჯიის შტატში, შტორმის შედეგად 14, ხოლო მისისიპში 4 ადამიანი დაიღუპა.

უამინდობის შედეგად, 50-ზე მეტი ადამიანი დაშავდა, ხოლო 480-მდე საცხოვრებელი სახლი განადგურდა.

ამინდის ეროვნული ბიუროს ინფორმაციით, ტორნადოს საშიშროება სამხრეთ ფლორიდაშიც არის.

გავრცელებული ინფორმაციით, ამერიკის შეერთებული შტატების პრეზიდენტმა, დონალდ ტრამპმა უამინდობის შედეგად დაღუპული ადამიანების გამო, მწუხარება გამოთქვა.