ბრაკონიერობის კიდევ ერთი შემთხვევა, დუშეთის მუნიციპალიტეტში, სოფელ ჩარგლის მიმდებარედ მოხდა. გარემოს დამცველებმა შველზე ნადირობის ფაქტი გამოავლინეს.

დეპარტამენტის თანამშრომლებმა მონადირეების 6 კაციანი ჯგუფი დააკავეს, რომლებსაც უკვე მოპოვებული და დანაწევრებული შველი აღმოაჩნდათ. ყველა მათგანი იდენტიფიცირებულია. ბრაკონიერები ჩადენილ დანაშაულს აღიარებენ.

როგორც გარემოსდაცვითი ზედამხედველობის დეპარტამენტში აცხადებენ, გარემოსთვის მიყენებული ზიანი 5000 ლარია. გარემოს დამცველებმა ფაქტთან დაკავშირებით შესაბამისი ოქმი შეადგინეს.

როგორც დეპარტამენტში აცხადებენ, ქმედება საქართველოს სისხლის სამართლის კოდექსით გათვალისწინებული დანაშაულის ნიშნებს შეიცავს, შესაბამისად, მასალები შინაგან საქმეთა სამინისტროში გადაიგზავნება.