14:00 საათზე, მთავარ პროკურატურაში, საპატრიარქოს ქონების მართვის სამსახურის უფროსის, მამა გიორგი მამალაძის დაკავების ფაქტზე, საგანგებო ბრიფინგი გაიმართება. ამის შესახებ, საქართველოს მთავარი პროკურატურის სიანფორმაციო სამსახური აცხადებს.

მამა გიორგი მამალაძე, იოაკიმესა და ანას სახელობის სამშობიაროს ხელმძღვანელი,პარასკევს გამთენიისას, თბილისის საერთაშორისო აეროპორტში დააკავეს. სასულიერო პირის დაკავების მიზეზი ჯერჯერობით უცნობია.

დეტალებზე ამ დრომდე არც ერთ ოფიციალურ უწყებაში არ საუბრობენ. „რუსთავი 2"-ის ინფორმაციით, სავარაუდო ვერსიად, პატრიარქის შესაძლო მოწამვლის მცდელობა სახელდება.

მამა გიორგი მამალაძის დაკავებას, ბათუმისა და ლაზეთის მიტროპოლიტი დიმიტრი ეხმაურება, რომელიც ბერლინში, საქართველოს კათოლიკოს პატრიარქთან ერთად იმყოფება.

„ჩვენ ყველანაირად ვენდობით სამართალდამცავ ორგანოებს და გამოძიების გადაწყვეტილებას თავისთავად უპირობოდ ვაღიარებთ" , - განაცხადა მიტროპოლიტმა დიმიტრი შიოლაშვილმა, „რუსთავი 2"-თან საუბრისას.