სრულიად საქართველოს კათოლიკოს-პატრიარქი ილია მეორე, ბერლინიდან თბილისში დღეს, 17:30 საათზე დაბრუნდება. უწმინდესი და უნეტარესი თანმხლებ პირებთან ერთად თბილისის აეროპორტში ჩარტერული რეისით ჩამოვა. პატრიარქს აეროპორტში მრევლი, სასულიერო პირები და საზოგადოების წარმომადგენლები დახვდებიან.

კათოლიკოს-პატრიარქი გერმანიაში სამკურნალოდ 2 თებერვალს გაემგზავრა. უწმინდესს 13 თებერვალს ნაღვლის ბუშტზე ქირურგიული ოპერაცია ჩაუტარდა.

ამ დროისთვის უწმინდესის მდგომარეობა დამაკმაყოფილებელია. პატრიარქის ექიმის, ცისანა შარტავას განცხადებით, ილია მეორე თავს კარგად გრძნობს.

„ყველა მაჩვენებელი, რასაც კლინიკის ექიმები ყოველდღიურად აკვირდებიან, დამაკმაყოფილებელია. საქართველოს ვულოცავ პატრიარქის წარმატებულ ოპერაციას" , - განაცხადა ცისანა შარტავამ.