საბჭოთა ოკუპაციის დღესთან დაკავშირებით, სახელმწიფო უწყებების შენობებზე საქართველოს დროშები დაუშვეს. სახელმწიფო სიმბოლო პარლამენტის, თავდაცვისა და შინაგან საქმეთა სამინისტროების შენობებზე, ასევე პრეზიდენტის სასახლეზე დაუშვეს. ამის შესახებ ინფორმაციას, აღნიშნული სამთავრობო ორგანოები ავრცელებენ.

2010 წლის 21 ივლისის დადგენილებით, 25 თებერვალი საბჭოთა ოკუპაციის დღედ არის გამოცხადებული. ამ დღეს ოკუპაციის მსხვერპლთა პატივსაცემად, წუთიერი დუმილი ცხადდება და საქართველოს მთელ ტერიტორიაზე, სახელმწიფო უწყებების შენობებზე, სახელმწიფო დროშები ეშვება.

დაღუპული გმირების პატივსაცემად, იუნკერების ძმათა სასაფლაოზე ყვავილები გვიან ღამით „ნაციონალური მოძრაობის" წარმომადგენლებმა, ასევე სტუდენტებმა და ახალგაზრდული ორგანიზაციების წევრებმა მიიტანეს.

1921 წლის 25 თებერვალს, თბილისში ბოლშევიკების მე-11 არმია შევიდა და საქართველო საბჭოთა სოციალისტურ რესპუბლიკად გამოაცხადა.

ძირითადი ბრძოლა კოჯრისა და ტაბახმელას მიდამოებში გაიმართა. ბრძოლის ველზე გმირულად დაეცნენ იუნკერები.