უცხოური მედიის ცნობით, ჩილეში სასმელი წყლის დეფიციტი უამინდობამ გამოიწვია. ინფორმაციას გამოცემა „Reuters"-ი ავრცელებს.

ძლიერმა წვიმამ ქვეყნის რამდენიმე რაიონში წყალდიდობა და მეწყერი გამოიწვია. სტიქიის შედეგად დაბინძურდა წყლის რეზერვუარებიც. წყალდიდობამ დედაქალაქ სანტიაგოსთან ახლოს წყალმომარაგების მაგისტრალური ხაზი დააზიანა, რის გამოც, მილიონზე მეტი ადამიანი სასმელი წყლის გარეშეა დარჩენილი. მთავრობამ სკოლების, ბაღებისა და სხვა სახელმწიფო დაწესებულებების დროებით დახურვის გადაწყვეტილება მიიღო.

ჩილეს საგანგებო სიტუაციების სამსახურში აცხადებენ, რომ სტიქიის შედეგად რამდენიმე სოფელი გარესამყაროსაა მოწყვეტილი.

გავრცელებული ინფორმაციით, უამინდობის გამო 3 ადამიანი დაიღუპა, 19 კი უგზოუკვლოდ არის დაკარგული.