ისრაელის სახელმწიფოს შეფასებით, საქართველოში რასის, რელიგიის, ეროვნების, გარკვეული სოციალური ჯგუფისადმი კუთვნილების ან პოლიტიკური შეხედულებების გამო დევნის საფუძვლიანი საფრთხე არავის ემუქრება. ამის შესახებ განცხადებას, საქართველოს საგარეო საქმეთა სამინისტრო ავრცელებს.
საგარეო უწყების განცხადებით, საქართველოს მოქალაქეთა მიერ თავშესაფრის მიღების მიზნით წარდგენილი განცხადებები, რეალური მიზეზის არსებობის გარეშე არ დაკმაყოფილდება.
საქართველოს უსაფრთხო ქვეყნების სიაში შეყვანით, თავშესაფრის მიღების მოთხოვნით წარდგენილი განცხადებების განხილვის პროცედურა შეიცვლება.
თავშესაფრის მოთხოვნის განცხადება განხილულ იქნება განსაკუთრებით დაჩქარებული წესით, მაქსიმუმ ერთი თვის განმავლობაში.საქართველოს მოქალაქეს, განცხადების განხილვის პერიოდში ისრაელში დასაქმების უფლება არ ექნება.
ისრაელი რიგით მეხუთე ქვეყანაა, ბელგიის, საფრანგეთის, ბულგარეთისა და ავსტრიის შემდეგ, რომელმაც საქართველო უსაფრთხო ქვეყნების სიაში შეიყვანა.