ოკუპირებული აფხაზეთის დეფაქტო ხელისუფლების გადაწყვეტილებით, 5 მარტიდან ნაბაკევი-ხურჩისა და ოტობაია-ორსანტიის ე.წ. გადასასვლელები დაიკეტება. „მოამბის" ინფორმაციით, ამის შესახებ ადგილობრივი მოსახლეობა უკვე ღიად საუბრობს. მოქალაქეები ამბობენ, რომ მოძრაობის გადასაკეტად მზად არის რკინა-ბეტონის კონსტრუქციები და რკინის ბადეები. მათი თქმით, ე.წ. გადასასვლელების ჩაკეტვის შემთხვევაში, ისინი გაუსაძლის მდგომარეობაში აღმოჩნდებიან, ვინაიდან მოუწევთ ისარგებლონ ენგურის ცენტრალური ხიდით ან ფახულანი-საბერიოს გადასასვლელით.

ნაბაკევი-ხურჩისა და ოტობაია-ორსანტიის ე.წ. გადასასვლელების მოსალოდნელი გადაკეტვის შესახებ ინფორმაცია საქართველოს ხელისუფლებამ საერთაშორისო ორგანიზაციებს მიაწოდა. აღნიშნული საკითხი გალის მოლაპარაკებების ფარგლებშიც განიხილეს.