ევროპარლამენტში შემავალი ძირითადი პოლიტიკური ჯგუფების წარმომადგენლებმა გიორგი კვირიკაშვილს, ასევე ფედერიკა მოგერინის და ევროკომისიას, წერილით მიმართეს. ევროპელი კანონმდებლები მათი თქმით „რუსთავი 2"-ზე მიმდინარე ზეწოლის გამო შეშფოთებას გამოთქვამენ.

წერილის მიხედვით,ტელეკომპანიის საქმიანობაში ჩარევა და მედიაგარემოს დამოუკიდებლობის დაბალი ხარისხი საქართველოს ევროკავშირთან ასოციირების გზაზე ხელს შეუშლის.

„არხის მფლობელების შეცვლა და აქედან გამომდინარე, ცვლილება მის სარედაქციო პოლიტიკაში, რაც „რუსთავი 2"-ს მთავრობისადმი მეგობრულად განწყობილ მორიგ მაუწყებლად გადააქცევს, სერიოზულად შეუშლის ხელს დემოკრატიის ხარისხსა და თავისუფალ მედიას საქართველოში" , - ნათქვამია ევროპარლამენტარების წერილში.