თურქეთის პრეზიდენტმა რეჯეფ თაიფ ერდოღანმა სტამბოლში სიტყვით გამოსვლისას განაცხადა, რომ თურქეთის მოქალაქეები გაანადგურებენ ნიდერლანდების ანტითურქულ გეგმებს. მან აღნიშნა, რომ ნიდერლანდების მთავრობის მიერ თურქეთის საგარეო საქმეთა მინისტრის როტერდამში შეშვების ნებართვის გაუქმების გადაწყვეტილებას უკუეფექტი ექნება.

„16 აპრილის საკონსტიტუციო ცვლილებების შესახებ რეფერენდუმის შემდეგ თურქეთი საპასუხო ნაბიჯებს გადადგამს. ანკარას შეუძლია მოთმინება. ვნახოთ, ამის შემდეგ როგორ დაეშვებიან თქვენი თვითმფრინავები თურქეთში. ვგულისხმობ დიპლომატების თვითმფრინავებს", - აღნიშნა თურქეთის ლიდერმა.