ჯეიმს აპატურაი ოკუპირებული აფხაზეთის რეგიონში ე.წ. არჩევნების ჩატარებას ეხმაურება და აცხადებს, რომ ნატო მის ლეგიტიმურობას არ ცნობს. კავკასიასა და ცენტრალურ აზიაში, ნატო-ს გენერალური მდივნის სპეციალური წარმომადგენლის განცხადება ალიანსის ოფიციალურ ვებგვერდზე არის გამოქვეყნებული.

„ნატო არ აღიარებს 12 მარტს ოკუპირებული აფხაზეთის რეგიონში ჩატარებულ ე.წ. არჩევნებს. ნატო მხარს უჭერს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში და არ ცნობს საქართველოს რეგიონების - აფხაზეთისა და სამხრეთ ოსეთის დამოუკიდებლობას" - აღნიშნულია აპატურაის განცხადებაში.

ოკუპირებულ აფხაზეთში ე.წ. საპარლამენტო არჩევნები 12 მარტს გაიმართა. როგორც არჩევნების შედეგების შეჯამებისას გახდა ცნობილი, დე-ფაქტო საპარლამენტო არჩევნების მეორე ტური 22 ოლქში ჩატარდება. პირველ ტურში მხოლოდ 12 დეპუტატი აირჩიეს. მეორე ტური 26 მარტს ჩატარდება.