თეთრი სახლის სპიკერმა, შონ სპაისერმა განმარტა, თუ რატომ არ ჩამოართვა ხელი დონალდ ტრამპმა ანგელა მერკელს ოვალურ კაბინეტში. ამის შესახებ გამოცემა „Spiegel"-ი წერს.

„ვფიქრობ, რომ მან უბრალოდ ვერ გაიგო რა სთხოვეს",- თქვა სპაისერმა და სიტუაცია გაუგებრობით ახსნა.

თეთრ სახლში ფოტოსესიის დროს, ჟურნალისტებმა ამერიკის პრეზიდენტს და გერმანიის კანცლერს სთხოვეს ერთმანეთისთვის ხელი ჩამოერთვათ. „ბატონო პრეზიდენტო, ჩვენ შეგვიძლია ხელი ჩამოვართვათ ერთმანეთს" , - მიმართა მერკელმა ტრამპს, მაგრამ პრეზიდენტს კანცლერის რეპლიკაზე რეაქცია არ ჰქონია.

მედიის დიდმა ნაწილმა გადაწყვიტა, რომ ტრამპმა შეგნებულად არ ჩამოართვა ხელი კანცლერს.

ტრამპმა „Twitter"-ზე დაწერა, რომ მერკელთან შესანიშნავი შეხვედრა ჰქონდა. ხოლო „Facebook"-ზე გამოაქვეყნა ფოტო, რომელშიც გერმანიის კანცლერს ხელს ართმევს.

გერმანიის კანცლერის და აშშ-ის პრეზიდენტის შეხვედრა 17 მარტს, თეთრ სახლში გაიმართა.