საქართველოს პრეზიდენტი გიორგი მარგველაშვილი ტელეკომპანია „მაესტროს" ეთერში პარლამენტის თავჯდომარის განცხადებას გამოეხმაურა, რომ მარგველაშვილის განცხადებების გამო, საკონსტიტუციო კომისიამ შეიძლება პრეზიდენტის არაპირდაპირი არჩევის წესის, მომავალი წლიდან შემოღებაზე იფიქროს.

„მე ვფიქრობ, კონსტიტუციური პროცესისთვის ადეკვატური განცხადება არ არის ეს. თუ მე კარგ განცხადებას გავაკეთებ, ერთი ტიპის კონსტიტუცია ექნება ქვეყანას. თუ განცხადება არ მოეწონებათ - მეორე ტიპის კონსტიტუცია, თუ საერთოდ გავჩუმდები, შეიძლება მესამე ტიპის კონსტიტუცია ჰქონდეს - ეს მისაღებია?! ჩემთვის არა, თქვენთვის, ქართული საზოგადოებისთვის მისაღებია, რომ კონსტიტუციის მოდელი იმის მიხედვით იცვლებოდეს, როგორ განცხადებას გავაკეთებ მე?!", - განაცხადა პრეზიდენტმა.