უვიზო რეჟიმის ამოქმედების შემდეგ, პირველი ავიარეისი საქართველოდან პოლონეთში შესრულდება. თბილისის საერთაშორისო აეროპორტის პრესსამსახურის ინფორმაციით, 28 მარტს შოთა რუსთაველის სახელობის აეროპორტიდან პოლონეთის მიმართულებით ფრენა, 04:55 საათზეა დაგეგმილი.

შემდეგი ფრენა ათენის მიმართულებით, 05:15 საათზე იქნება, რომლითაც საქართველოს პრემიერმინისტრი ახალგაზრდებთან, მეცნიერებთან და ჟურნალისტებთან ერთად იმგზავრებს.

მესამე პირდაპირი რეისი თბილისის საერთაშორისო აეროპორტიდან მიუნხენის მიმართულებით, 05:35 საათზე შედგება.

რაც შეეხება ქუთაისის, დავით აღმაშენებლის სახელობის აეროპორტიდან დაგეგმილ ავიარეისებს, ბუდაპეშტის მიმართულებით რეისი 05:45 საათზე შესრულდება, ასევე, ქუთაისიდან სალონიკის მიმართულებით ფრენა 06:00 საათზეა დაგეგმილი.

ხვალიდან საქართველოს მოქალაქეები ევროპაში მოგზაურობას ვიზის გარეშე შეძლებენ.

ბიომეტრიული პასპორტის მქონე საქართველოს მოქალაქეებს უვიზოდ გადაადგილების უფლება ევროკავშირის 22 წევრ ქვეყანაში ექნებათ.