ფარული მოსმენების შესახებ კანონთან დაკავშირებით, პრეზიდენტის საპარლამენტო მდივანი, ანა დოლიძე კამპანია „ეს შენ გეხება"-ს წევრებს ხვდება. არასამთავრობო სექტორი კანონის საკონსტიტუციო სასამართლოში გასაჩივრებისთვის ემზადება. პრეზიდენტის ადმინისტრაციაში არ გამორიცხავენ, რომ სარჩელზე მათი ხელმოწერაც დაფიქსირდეს.
„თანამშრომლობის არცერთ ფორმას არ გამოვრიცხავთ, ამ შეხვედრების მიზანი სწორედ ის არის, რომ სარჩელთან დაკავშირებით მუდმივ კონტაქტზე ვიყოთ" , - განაცხადა ანა დოლიძემ.
საქართველოს პარლამენტმა ფარულ მოსმენებთან დაკავშირებულ კანონპროექტზე, პრეზიდენტის ვეტო 22 მარტს დაძლია. გიორგი მარგველაშვილმა კანონპროექტს ვეტო 20 მარტს დაადო.
პრეზიდენტი მიიჩნევს, რომ ცვლილებების მიხედვით, სუს-ს დაქვემდებარებული სააგენტო დამოუკიდებელი ვერ იქნება. მისი თქმით, კანონი საკომუნიკაციო კომპანიებს გაუმართლებელ და არაპროგნოზირებად ხარჯებს აკისრებს.