გარემოს დაცვის ინსპექტორებმა, ბზის უკანონო მოპოვებისა და ტრანსპორტირების ფაქტი გამოავლინეს. ბზის ტოტებით დატვირთული მიკროავტობუსი, რომელსაც მოქალაქე ჯიმშერ შულაია მართავდა, მარტვილის მუნიციპალიტეტში, ლებარდეს მიმდებარე ტერიტორიაზე შეაჩერეს. გარემოსადმი მიყენებული ზიანის ოდენობამ 49 124 ლარი შეადგინა.

გარემოსდაცვითი ზედამხედველობის დეპარტამენტის ინფორმაციით, ფაქტი სისხლის სამართლის კოდექსით გათვალისწინებულ დანაშაულის ნიშნებს შეიცავს და მასალები საგამოძიებო ორგანოს გადაეგზავნა.

ბზობის დღესასწაულის მოახლოებასთან დაკავშირებით, გარემოს დაცვის სამინისტრო ბზის მოჭრაზე კონტროლს ამკაცრებს. უწყებაში აცხადებენ,რომ სამართალდამრღვევებზე კანონით დადგენილი სანქციები გავრცელდება.

საჯარიმო სანქციების ოდენობა, 200-დან 500 ლარამდეა, ხოლო, თუ გარემოსათვის მიყენებული ზიანი 1000 ლარს გადააჭარბებს,სისხლის სამართლის საქმე აღიძვრება.

ბზის მოპოვება მხოლოდ კერძო საკუთრებაში არსებული სანერგეებიდან, ხელოვნურად გაშენებული პლანტაციებიდან არის შესაძლებელი.