საკანონმდებლო ორგანოში პრეზიდენტის ყოველწლიური გამოსვლის დასრულების შემდეგ, გიორგი მარგველაშვილის გამოსვლა მმართველმა გუნდმა შეაფასა. პრემიერმინისტრის თქმით, ეს უბრალოდ ტრადიციული გამოსვლა იყო, სადაც მარგველაშვილმა მიმდინარე მოვლენებზე ისაუბრა და შეაფასა: „ვისურვებდი, პრეზიდენტის გამოსვლა ყოფილიყო უფრო ღრმა და ობიექტური" , - განაცხადა გიორგი კვირიკაშვილმა. გიორგი მარგველაშვილის გამოსვლას გამოეხმაურა მმართველი გუნდის წევრი, გიორგი ვოლსკიც:

„რეფორმებთან და საკონსტიტუციო ცვლილებებთან დაკავშირებით, მე ვფიქრობ, რომ ძირითადად მისი შეფასებები იყო არაადეკვატური ვითარების და გამოწვევების, საგარეო და საშინაო ურთიერთობის ბალანსის საკითხებთან დაკავშირებით. ვფიქრობ, გადაამეტა უფლებამოსილებას ამით უფრო პოლიტიკური პოზიციონირება მოახდინა," - განაცხადა ვოლსკიმ.