რუსთავში თოდრიას ქუჩაზე მაღალსართულიანი კორპუსის ფანჯრიდან გასროლის შედეგად შშმ პირმა ფეხის არეში დაზიანება მიიღო და ქალაქის საავადმყოფოშია გადაყვანილი. როგორც შინაგან საქმეთა სამინისტროში აცხადებენ, გასროლა პმევმატური იარაღიდან განხორციელდა. ადგილზე იმყოფება საპატრულო პოლიცია. სამართალდამცველები ფაქტის შესასწავლად შესაბამის ღონისძიებებს ატარებენ.

თვითმხილველის თქმით, სასწრაფო დახმარების ბრიგადა გამოიძახეს, თუმცა ექიმებმა დაშავებულს მიყენებულ ჭრილობაში ტყვია ვერ უპოვეს, ამიტომ სამედიცინო პროცედურებისთვის კლინიკაში გადაყვანა გახდა საჭირო. შსს-ს განცხადებით, მომხდარზე გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს. დაშავებულის ჯანმრთელობის მდგომარეობა დამაკმაყოფილებელია.