9 აპრილს დაღუპულ გმირთა მემორიალი მოქალაქეებმა და პოლიტიკოსებმა ყვავილებით შეამკეს. რუსთაველის გამზირზე, 9 აპრილის მემორიალთან პრემიერმინისტრი, პარლამენტის თავმჯდომარე დეპუტატებთან ერთად, ასევე მინისტრთა კაბინეტის წევრები იმყოფებოდნენ.

„ჩვენი ვალია, პატივი მივაგოთ იმ ადამიანების ხსოვნას, რომლებმაც სიცოცხლე ჩვენი სამშობლოს თავისუფლებისა და დამოკიდებლობისათვის გაწირეს" , - განაცხადა ირაკლი კობახიძემ.

მათ გვირგვინებით შეამკეს მემორიალი და 9 აპრილის მსხვერპლთა ხსოვნას პატივი მიაგეს.პატრიარქმა 9 აპრილის მემორიალთან, დაღუპულთა ხსოვნისთვის პანაშვიდი გადაიხადა. მემორიალთან თბილისის მერიც იმყოფებოდა.

„ეს დღე არის თითოეული ადამიანისთვის შეხსენება, თუ როგორ უნდა მოიქცეს ქვეყნისთვის მებრძოლი ადამიანი" , - განაცხადა დავით ნარმანიამ.

9 აპრილის მოვლენები გორშიც გაიხსენეს. „9 აპრილის" ბაღში 28 წლის წინანდელი ტრაგედიის ამსახველი ფოტო და ვიდეომასალის ჩვენება მოეწყო.

1989 წლის 9 აპრილს გამთენიისას, საბჭოთა კავშირის შეიარაღებული ძალების ნაწილებმა თბილისში, რუსთაველის გამზირზე, მშვიდობიანი საპროტესტო აქცია დაარბიეს. აქციის დარბევა დილის 4 საათზე დაიწყო.

დარბევისას საბჭოთა კავშირის შეიარაღებული ძალების ნაწილებმა, ქიმიური საშუალებები, სასანგრე ბარები, ცეცხლსასროლი იარაღი, ჯავშანტრანსპორტიორები და ტანკები გამოიყენეს. დარბევის შედეგად 21 ადამიანი დაიღუპა, ხოლო ათასობით მოქალაქე მოიწამლა.

1989 წლის 9 აპრილიდან 2 წლის შემდეგ, 1991 წლის 9 აპრილს, საქართველოს უზენაესმა საბჭომ საქართველოს სახელმწიფოებრივი დამოუკიდებლობა აღდგენილად გამოაცხადა.