ოკუპირებული ცხინვალის რეგიონში რიგით მე-6, ე.წ. საპრეზიდენტო არჩევნები ტარდება. ე. წ. ცესკო-ს განცხადებით, სულ 77 საარჩევნო უბანია, მათ შორის - 5 საზღვრებს მიღმა, აქედან ერთი - სოხუმში. საოკუპაციო რეჟიმის ცნობით, პროცესს 80-მდე უცხოელი დამკვირვებელი ადევნებს თვალს.

ე.წ საარჩევნო უბნები რეგიონში დილის 8:00 საათზე გაიხსნა. ე.წ. პრეზიდენტის პოსტის დასაკავებლად სამი კანდიდატი იბრძვის. ესენი არიან საოკუპაციო რეჟიმის ამჟამინდელი ლიდერი ლეონიდ თიბილოვი, პარლამენტის სპიკერი, ანატოლი ბიბილოვი და უშიშროების სამსახურის თანამშრომელი ალან გაგლოევი.

ე.წ. პრეზიდენტის არჩევის გარდა, ოკუპირებული რეგიონის მოსახლეობამ სამხრეთ ოსეთისთვის სახელის შეცვლის და ისევ „ალანიას" დარქმევის საკითხიც უნდა გადაწყვიტოს. ეს ლეონიდ თიბილოვის ინიციატივა იყო.