ოკუპირებული ცხინვალის რეგიონში რიგით მე-6, ე.წ. საპრეზიდენტო არჩევნები ტარდება. ოკუპირებული სამხრეთ ოსეთის „ცესკო" ე. წ. საპრეზიდენტო არჩევნების და რეფერენდუმის წინასწარ მონაცემებს აქვეყნებს,რომლის მიხედვითაც ჯერჯერობით პარლამენტის სპიკერი, ანატოლი ბიბილოვი ლიდერობს.

მას ხმების 57,98 % აქვს. 30 %-იანი მხარდაჭერა აქვს საოკუპაციო რეჟიმის ამჟამინდელ ლიდერს ლეონიდ თიბილოვს, ხოლო უშიშროების სამსახურის თანამშრომელს, ალან გაგლოევს მოსახლეობის 11,1 % უჭერს მხარს.

ე.წ. პრეზიდენტის არჩევის გარდა, ოკუპირებული რეგიონის მოსახლეობამ სამხრეთ ოსეთისთვის სახელის შეცვლის და ისევ „ალანიას" დარქმევის საკითხიც უნდა გადაწყვიტოს. ეს ლეონიდ თიბილოვის ინიციატივა იყო.

ოკუპირებული სამხრეთ ოსეთისთვის სახელის შეცვლას 78 %-ზე მეტმა ამომრჩეველმა დაუჭირა მხარი. ხმების დათვლა გრძელდება.

ე. წ. არჩევნების მიმდინარეობას რუსეთის და ოკუპირებული ყირიმის წარმომადგენლები აკვირდებოდნენ. მათი თქმით, პროცესმა დარღვევების გარეშე ჩაიარა.