დიდი ბრიტანეთის საგარეო საქმეთა მინისტრი, ბორის ჯონსონი რუსეთის წინააღმდეგ ახალი სანქციების დაწესებას გეგმავს იმ შემთხვევაში, თუ მოსკოვი სირიის პრეზიდენტ, ბაშარ ასადის მხარდაჭერას არ შეწყვეტს. ამის შესახებ ინფორმაციას, გამოცემა „The Times"-ი ავრცელებს.

ბრიტანული მედიის მიხედვით, ბორის ჯონსონი „დიდი შვიდეულის" ქვეყნებს ერთობლივი განცხადების გავრცელებას სთავაზობს.სანქციებზე დოკუმენტი უკვე მომზადდა და ის G7 ქვეყნების საგარეო საქმეთა სამინისტროს წარმომადგენლებს იტალიაში გამართულ შეხვედრაზე გაეგზავნებათ.

მანამდე,გაეროში აშშ-ის მუდმივმა წარმომადგენელმა, ნიკი ჰეილიმ განაცხადა, რომ დონალდ ტრამპი რუსეთისა და ირანის წინააღმდეგ ასადის რეჟიმის მხარდაჭერის გამო, ახალ სანქციებს არ გამორიცხავს.

სირიაში, იდლიბის პროვინციაში ავიაიერიში 4 აპრილს მოხდა.ქიმიური იარაღით თავდასხმისას 89 მშვიდობიანი მოქალაქე დაიღუპა და 300-მდე მძიმედ დაშავდა. დაღუპულთა შორის 8 წლამდე ასაკის 11 ბავშვია.

სირიაში ქიმიური იარაღის სავარაუდო გამოყენებაზე საპასუხოდ, ამერიკის შეერთებულმა შტატებმა ასადის რეჟიმის მიერ კონტროლირებად ობიექტზე, ჰომსთან მდებარე ავიაბაზაზე, სარაკეტო იერიში მიიტანა.