ტელეკომპანია NTV" -ის ინფორმაციით, თურქეთის პროვინცია დიარბაქირში, რეფერენდუმის მიმდინარეობისას მოქალაქეთა ჯგუფებს შორის სროლის შედეგად 2 ადამიანი დაიღუპა. სროლა საარჩევნო უბანთან ახლოს მოხდა. წინასწარი ვერსიით, დაპირისპირების მიზეზი პოლიტიკური შეხედულებებს შორის სხვაობა გახდა.

საარჩევნო უბნები თურქეთის ტერიტორიაზე ადგილობრივი დროით დილის 8:00 საათზე გაიხსნა. სარეფერენდუმო ცვლილებები ითვალისწინებს საპარლამენტოდან საპრეზიდენტო რესპუბლიკაზე გადასვლას, პრემიერის თანამდებობის გაუქმებას, საპარლამენტო მანდატების რაოდენობის გაზრდას (550-დან 600-მდე) და უზენაესი სასამართლოს და პროკურორების კოლეგიის რეფორმირებას.

თუკი მოსახლეობა ამ ცვლილებებს მხარს დაუჭერს, მორიგი საპრეზიდენტო და საპარლამენტო არჩევნები 2019 წლის 3 ნოემბერს ერთად გაიმართება.