შინაგან საქმეთა სამინისტროს განცხადებით, დედაქალაქში, შარტავას ქუჩაზე მშენებლობისას მუშა გარდაიცვალა. შუა ხნის მამაკაცი მაღალსართულიანი კორპუსის მშენებარე ობიექტიდან გადმოვარდა.

ადგილზე მობილიზებულია სასწრაფო-სამედიცინო და საპატრულო პოლიციის ბრიგადები.

მომხდართან დაკავშირებით მიმდინარეობს გამოძიება სისხლის სამართლის კოდექსის 240-ე მუხლით, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს. ისჯება თავისუფლების შეზღუდვით ვადით ხუთ წლამდე ან თავისუფლების აღკვეთით ვადით ორიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.