ქართველ ფერმერთა ასოციაცია მოსახლეობას 25-26-27 აპრილს, მოსალოდნელი დაბალი ტემპერატურის (-3) გამო აფრთხილებს და მცენარეების დაცვისთვის რჩევებს აძლევს. ამის შესახებ გაერთიანების წარმომადგენლები ოფიციალურ გვერდზე იტყობინებიან.

„გაზაფხულზე ჰაერის ტემპერატურის მკვეთრად ვარდნისას საჭიროა მცენარის დაცვა წაყინვისაგან. რეკომენდირებულია ახალგაზრდა ნერგების შეფუთვა. ბოსტნეულ კულტურებს შეგიძლიათ გადააფაროთ საფარი, რაც დაიცავს ყინვისგან, ხოლო ზრდასრული ხეხილისა და ვაზისათვის საჭიროა დაბოლება" , - ნათქვამია ფერმერთა ასოციაციის განცხადებაში.

რეკომენდაციების მიხედვით, დასაბოლებელი ცეცხლი გამთენიისას უნდა დაინთოს, როდესაც ჰაერში ყველაზე დაბალი ტემპერატურა დაფიქსირდება. დასაწვავად ჩალა ან ნამჯის ნარჩენი უნდა გამოიყენონ, რადგან აუცილებელია მასალა დიდი რაოდენობით კვამლს გამოყოფდეს.დასაწვავი მასალა ნაკვეთის თავში, შუაში და ბოლოში უნდა განთავსდეს და კვამლი ყველა ხესთან უნდა იყოს.