საზოგადოებრივი მაუწყებლის ინფორმაციით, განათლების სამინისტრომ პირველად საჯარო სექტორში, საპილოტე რეჟიმში, თანამშრომლებისთვის ახალი პროექტი „სახლიდან მუშაობის დღე" დანერგა.
სამინისტროს ცნობით, სამუშაოს სპეციფიკის გათვალისწინებით, თანამშრომელი უშუალო ხელმძღვანელთან შეთანხმებით, თვის განმავლობაში ერთი დღე მასზე დაკისრებულ მოვალეობებს სახლიდან შეასრულებს, რაც სამსახურში გამოუცხადებლობად არ ჩაეთვლება.
„დისტანციური მუშაობის თანმდევი და განუყოფელი შედეგებია მგზავრობის დროისა და საწვავის ხარჯების შემცირება, მოძრაობის განტვირთვა, საჯარო დაწესებულების კომუნალური ხარჯების ეკონომია, მაგრამ ყველაზე მთავარი უპირატესობა, რასაც საერთაშორისო პრაქტიკაც აჩვენებს, არის კომფორტულ გარემოში შემოქმედებისა და ინოვაციის გაცილებით უფრო მაღალი პოტენციალი" , - ნათქვამია სამინისტროს განცხადებაში.