ინდოეთის შტატ მადჰა-ფრადეშში, მასობრივ ქორწილში პატარძლებმა საჩუქრად ქმრებისგან დასაცავად ხის ხელკეტები მიიღეს. ამის შესახებ „BBC"-ი წერს.

გოგონებს ნახევარმეტრიანი ხელკეტები ერთ-ერთმა მინისტრმა, გოპალ ბჰარგავამ გადასცა. მან პატარძლებს მოუწოდა, რომ ხელკეტი იმ შემთხვევაში გამოიყენონ, თუ ნასვამი მეუღლეები მათ შეურაცხყოფას დააპირებენ.

მინისტრის თქმით, მას ოჯახური ძალადობის მსხვერპლი ქალების დახმარება სურს.გოპალ ბჰარგავამ გოგონებს ურჩია ჯერ სიტყვით შეეცადონ ქმრების დამშვიდება და თუ ამ გზით ვერაფერს გახდებიან, მაშინ ხელკეტები გამოიყენონ.მინისტრის ინფორმაციით, ამ მიზნით 10 ათასი ხელკეტი აქვს შეკვეთილი.

მასობრივ ქორწილში აღნიშნული საჩუქარი 700-მა პატარძალმა მიიღო. ყველა ხელკეტზე იყო წარწერა - „მთვრალების საცემად" და „პოლიცია არ ჩაერევა".

ინდოეთში მასობრივი ქორწილები ხშირად ტარდება. ასეთი ცერემონიებით, ხარჯების შემცირების მიზნით, ძირითადად დაბალშემოსავლიანი ოჯახები სარგებლობენ.