7 მაისს საფრანგეთში საპრეზიდენტო არჩევნების მეორე ტური გაიმართება.

ფრანგი ამომრჩევლების უსაფრთხოებას 50 000 პოლიციელი იცავს.

პირველ ტურში, ერთ-ერთმა კანდიდატმა, ემანუელ მაკრონმა ხმების 23,75 % მიიღო, „ნაციონალური ფრონტის" ლიდერმა, ულტრამემარჯვენე მარინ ლე პენმა კი 21,53 %.

ტელეკომპანია „BFMTV"-ს გამოკითხვის მიხედვით, საფრანგეთის საპრეზიდენტო არჩევნების მეორე ტურის წინ გამართულ ტელედებატებში ემანუელ მაკრონმა გაიმარჯვა - 63 %-ით. მარინ ლე პენს ხმა რესპონდენტთა 34 %-მა მისცა.

ლე პენი პოზიციონირებს, როგორც ნაციონალისტი, გლობალიზაციის წინააღმდეგ მებრძოლი და მკაცრი საიმიგრაციო პოლიტიკის მომხრე, ხოლო მაკრონი - როგორც ინტერნაციონალისტი და ევროკავშირის მხარდამჭერი.

მაკრონი ევროპული იდეის მომხრეა, მაგრამ მოქალაქეების აზრსაც ითვალისწინებს. პოლიტიკოსი გამარჯვების შემთხვევაში, მანდატს ევროკავშირის სიღრმისეული რეფორმისთვის გამოიყენებს.