საგარეო საქმეთა სამინისტროს ინფორმაციით, ზურაბ პოლოლიკაშვილი ტურიზმის მსოფლიო ორგანიზაციის გენერალური მდივნად აირჩიეს. პოლოლიკაშვილი თანამდებობას 2021 წლამდე დაიკავებს.
„აღსანიშნავია, რომ ეს პირველი შემთხვევაა, როდესაც საქართველოს კანდიდატი მნიშვნელოვანი საერთაშორისო ორგანიზაციის ხელმძღვანელად აირჩიეს" , - აცხადებენ უწყებაში.
არჩევნები მადრიდში ორგანიზაციის აღმასრულებელი საბჭოს 105-ე სესიის ფარგლებში გაიმართა. ზურაბ პოლოლიკაშვილის კანდიდატურას საბჭოს წევრი ქვეყნების უმრავლესობამ დაუჭირა მხარი.
„საერთაშორისო ორგანიზაციის წამყვან მმართველ თანამდებობაზე საქართველოს კანდიდატურის არჩევა ხაზს უსვამს საქართველოს როლს და მის მისწრაფებას წვლილი შეიტანოს საერთაშორისო მმართველობის განხორციელებაში" , -აცხადებენ საგარეო საქმეთა სამინისტროში.
ზურაბ პოლოლიკაშვილი ესპანეთის სამეფოში საქართველოს საგანგებო და სრულუფლებიანი ელჩიცაა.