აშშ-ის პრეზიდენტი დონალდ ტრამპი FBI-ის ყოფილ ხელმძღვანელ ჯეიმს კომის სოციალური ქსელის საშუალებით აფრთხილებს: - „ჯეიმს კომი, შენთვისვე იქნება უკეთესი, რომ ჩვენი საუბრების ჩანაწერები არ არსებობდეს და მედიაში არ გავრცელდეს".

ჯეიმს კომი, რომელიც აშშ-ის არჩევნებში რუსეთის შესაძლო ჩარევის საქმის გამოძიებას ხელმძღვანელობდა, FBI-ის ხელმძღვანელის თანამდებობიდან ამერიკის პრეზიდენტმა გაათავისუფლა.

ჯეიმს კომი ტრამპის წინასაარჩევნო შტაბის წევრების რუსეთთან შესაძლო კავშირებს იძიებდა. ამასთან დემოკრატების საპრეზიდენტო კანდიდატი ჰილარი კლინტონი არჩევნებში თავის მარცხს სწორედ კომის აბრალებდა. FBI-ის დირექტორის მოვალეობის შემსრულებლად ენდრიუ მაკკეიბი დაინიშნა. რომელიც მანამდე ამავე უწყებაში დირექტორის მოადგილედ მუშაობდა.