ყაზბეგის რაიონსა და მთიულეთში მაღალი ძაბვის ელექტროგადამცემი ხაზების გაყვანას, საქართველოს საპატრიარქო ეხმიანება და სპეციალურ განცხადებას ავრცელებს, რომელსაც ხელს საქართველოს კათოლიკოს-პატრიარქი, ილია მეორე აწერს.

„გვესმის, რომ ქვეყანას ეკონომიკური წინსვლა სჭირდება და როგორც ჩანს, ეს არის მთავარი მოტივი აღნიშნული ქმედებისა, მაგრამ იგივე მიზანს ემსახურება ტურიზმის განვითარებაც. უცხოელებს ჩვენს კულტურასთან ერთად, ხელუხლებელი ბუნება და ეკოლოგიურად სუფთა გარემოც იზიდავთ. დასახლებულ პუნქტებთან მაღალი ძაბვის სადენების სიახლოვე ამ მხრივაც უარყოფითად იმოქმედებს" , - ნათქვამია საპატრიარქოს განცხადებაში.

საპატრიარქოს განცხადებით, ხელისუფლების მხრიდან მთის კანონის შემუშავება მნიშვნელოვანი სიახლეა და ეს მიღწევა მთის მოსახლეობასთან ბოლოდროინდელი წინააღმდეგობებით არ უნდა გადაიფაროს.