დაახლოებით ერთ თვეში, დასუფთავების ინსპექტორებმა თბილისში სულ 307 ადმინისტრაციული სამართალდარღვევის ოქმი შეადგინეს. როგორც „თბილსერვის ჯგუფში" განაცხადეს, 307-დან 102 შემთხვევაში უცხოელი დააჯარიმეს.

დასუფთავების ინსპექტორებმა დანაგვიანების გამო ჯარიმა 298 ფიზიკურ და 9 იურიდიულ პირს გამოუწერეს. „თბილსერვის ჯგუფის" ინფორმაციით, ამ დროისთვის სულ 32 920 ლარის ჯარიმა არის გამოწერილი.

ქვეითი ინსპექტორები თბილისში 3 აპრილიდან გამოჩნდნენ, დაჯარიმება კი 20 აპრილიდან დაიწყეს. ნარჩენების მართვის კოდექსის მიხედვით, ჯარიმა 2 კილოგრამი ნაგვის დაყრაზე 80 ლარია, 2 კილოგრამზე მეტი ნაგვის დაყრის შემთხვევაში კი სანქცია სხვადასხვანაირია და 1000 ლარს აღწევს.