(რეზონანსი) შსს ინტერნეტსივრცეში გავრცელებულ თამაშზე „ლურჯი ვეშაპი" განცხადებას ავრცელებს. თამაშის წესების მიხედვით, არასრულწლოვნები თვითდაზიანებებს იყენებენ და თვითმკვლელობითაც კი შეიძლება დაასრულონ სიცოცხლე.

შსს-ს ცნობით, აღნიშნული თამაში გავრცელებულია რუსეთში, დიდ ბრიტანეთსა და ევროპის სხვადასხვა ქვეყანაში. თამაშის დასასრულს, მოთამაშეს „კურატორი" აძლევს უკანასკნელ დავალებას, სადაც ის პირდაპირ მოუწოდებს მას თვითმკვლელობისკენ, რაც ხშირ შემთხვევაში, მოთამაშის ჯანმრთელობის მძიმე დაზიანებით ან ფატალური შედეგით სრულდება.

„მაღალი საზოგადოებრივი ინტერესიდან გამომდინარე, აღნიშნულ ფაქტთან დაკავშირებით, კრიმინალურმა პოლიციამ გამოძიება დაიწყო სსკ-ს 115-ე მუხლით, რაც თვითმკვლელობამდე ან თვითმკვლელობის ცდამდე მიყვანას გულისხმობს და სისხლის სამართლის კოდექსის 285-ე მუხლის 1-ლი ნაწილით, რაც კომპიუტერული მონაცემის ან კომპიუტერული სისტემის უკანონო გამოყენებას გულისხმობს" , - ნათქვამია შსს-ს განცხადებაში.

28 მაისს, საქართველოში, 12 წლის გოგო ე. წ. კურატორის დავალებით მე-5 სართულიდან გადახტა. ის სხეულის მრავლობითი დაზიანებით საავადმყოფოში წევს.