(რეზონანსი) არასამთავრობო ორგანიზაციებმა - „ტოლერანტობისა და მრავალფეროვნების ინსტიტუტმა" - „TDI" და „ადამიანის უფლებების სწავლებისა და მონიტორინგის ცენტრმა" - „EMC" ბათუმში ახალი მეჩეთის მშენებლობის ნებართვის თაობაზე სასამართლოს მიმართეს. ამის შესახებ ინფორმაციას „ბათუმელები" ავრცელებს.

სარჩელის ძირითადი მოთხოვნაა, რომ გაუქმდეს ბათუმის მერიის მიერ გაცემული უარყოფითი ცნობა,რომელიც მუსლიმებს მათ მიერ შეძენილ მიწის ნაკვეთზე მეჩეთის მშენებლობის საშუალებას არ აძლევს.

ბათუმში ახალი მეჩეთის მშენებლობის ფონდმა ბათუმის მერიას 8 თებერვალს მიმართა, მერიამ უარის პასუხი ფონდს 5 მაისს წერილობით გაუგზავნა.

თვითმმართველმა ორგანომ უარი იმ მოტივით დაასაბუთა, რომ ეს ტერიტორია მაღალი ინტენსივობის საცხოვრებელი ზონაა, საკულტო ნაგებობა კი საზოგადოებრივი თავშეყრის ადგილია. მერია მიიჩნევს, რომ განაშენიანება საცხოვრებელი სახლების მშენებლობით უნდა გაგრძელდეს.