(რეზონანსი) ალადაშვილის სახელობის საუნივერსიტეტო კლინიკის კრიტიკული მედიცინის დეპარტამენტის ცნობით, სამშენებლო ობიექტის მესამე სართულიდან გადმოვარდნილი შუა ხნის მამაკაცი რეანიმაციაში გადაიყვანეს, მისი მდგომარეობა ამ ეტაპისთვის მძიმეა.

დეპარტამენტის უფროსის, ლევან რატიანის განცხადებით პაციენტის მდგომარეობა კვლავ კრიტიკულია და იგი ხელოვნური სუნთქვის აპარატზეა მიერთებული. ექიმებს დაშავებულის მდგომარეობის გაუმჯობესების შესახებ პროგნოზის გაკეთება უჭირთ.

დღეს ჯავახიშვილის ქუჩაზე ერთ-ერთი სამშენებლო ობიექტიდან მამაკაცი გადმოვარდა.

დაშავებულის მდგომარეობა იმდენად მძიმე იყო, რომ თავდაპირველად გავრცელდა ინფორმაცია მისი დაღუპვის შესახებ, რომელიც მოგვიანებით არ დადასტურდა.