(რეზონანსი) ერდოღანის განცხადებით, თურქეთი მზად არის სირიაში ახალი სპეცოპერაციის დასაწყებად, რომლის ფარგლებშიც ანკარა კონტროლს დაამყარებს სირიულ ქალაქებზე მანბიჯსა და რაქაზე, რათა ეს ქალაქები სირიელი ქურთების მმართველობის ქვეშ არ მოექცეს:
„ამჟამად სირიაში არასასურველი პროცესები მიმდინარეობს. თუ ეს პროცესები თურქეთის საზღვრებს რაიმე ტიპის საფრთხეს შეუქმნის, ჩვენ ისევე ვიმოქმედებთ, როგორც "შიტ ევფრატი"-ს სპეცოპერაციისას", - განაცხადა ერდოღანმა.
ერდოღანის თქმით, სამწუხაროა ის ფაქტი, რომ ოფიციალური ანკარის პარტნიორი ქვეყნები ტერორისტებთან ერთად მოქმედებენ. საქმე ეხება აშშ-ის მიერ სირიელი ქურთებისთვის იარაღის მიწოდებას. თურქეთი სირიელ ქურთებს "ქურთისტანის მუშათა პარტიასთან" აკავშირებს, რომელსაც თურქეთის ხელისუფლება ტერორისტულ ორგანიზაციად მიიჩნევს. აშშ კი სირიელ ქურთებს, "ისლამური სახელმწიფოს" წინააღმდეგ ბრძოლაში მოკავშირეებად განიხილავს.