(რეზონანსი) სურსათის ეროვნული სააგენტო უარყოფს გავრცელებულ ინფორმაციას, რომ ქართულ სანელებლებში ტყვიის საგანგაშო რაოდენობაა. მათი თქმით, სუნელებს მუდმივად ამოწმებენ. 2015-2016 წლებში აღებული 38 ნიმუშიდან ტყვიის შემცველობა დასაშვებ ნორმას მხოლოდ ერთ შემთხვევაში აღემატებოდა. 2017 წელს აღებული 60-მდე ნიმუშის ლაბორატორიული კვლევის შედეგებს კი მიმდინარე კვირის განმავლობაში დადებენ.

„მასშტაბური დარღვევები არ ფიქსირდება. ქართული სუნელები შეზღუდვის გარეშე გადის 30-ზე მეტ ქვეყანაში, მათ შორის-ევროკავშირის ქვეყნებში" , - განაცხადა სურსათის ეროვნული სააგენტოს უფროსმა, ზურაბ ჩეკურაშვილმა.

ნიუ-იორკის ჯანდაცვის დეპარტამენტის ინფორმაციით, საქართველოში ნაყიდ, ან საქართველოდან აშშ-ში გაგზავნილ სუნელებში ტყვიის საგანგაშო დოზა აღმოჩნდა.

შემოწმებულ ერთ-ერთ ნიმუშში აღმოჩენილი ტყვიის საგანგაშო ოდენობა იყო 27 000 ერთეული მილიონზე. მაშინ, როცა, მაგალითად, ტკბილეულში ტყვიის დასაშვები, უსაფრთხო ზღვარი 0,1-ია.

ნიუ-იორკის ჯანდაცვის დეპარტამენტისგან განსხვავებით, პრობლემის არსებობას უარყოფს საქართველოს სურსათის ეროვნული სააგენტო.