(რეზონანსი) ე.წ. ციანიდის საქმის სასამართლო განხილვა გრძელდება, პროკურატურა მამა გიორგი მამალაძეს სხვადასხვა შპს-ში „მამაოს თანამდებობის" დაკავებასა და ანგარებაში ადანაშაულებს.
„ბრალდებული გიორგი მამალაძე სხვადასხვა შპს-ში გაფორმებული იყო შპს-ს მამაოდ. ყოველთვიურად იღებდა სხვადასხვა რაოდენობის ხელფასს და მათ შორის, საახალწლოდ - პრემიებსაც" , - განაცხადა პროკურორმა ზვიად გუბელიძემ.
მამა გიორგი მამალაძის ადვოკატი, მიხეილ რამიშვილი აცხადებს, რომ შპს-ს წარმომადგენლები ქველმოქმედების სახით, როგორც სულიერ მოძღვარს, მამა გიორგის თანხას აძლევდნენ და სტატუსი „შპს-ს მამაო" არ არსებობს.
მამა გიორგი მამალაძის კიდევ ერთი ადვოკატი, გიორგი ფანცულაია კი აცხადებს, რომ ბრალდებულ დეკანოზს ციანიდი პატრიარქის მდივან-რეფერენტმა, შორენა თეთრუაშვილმა სთხოვა და მისი უცნაური თხოვნების შესახებ არა ერთი მოწმე საუბრობს.
„აცხადებენ, რომ მდივან-რეფერენტისგან არა ერთხელ მოდის ისეთი დავალებები, თხოვნები ან მითითებები, რომელიც საერთოდ არ შედის მდივან-რეფერენტის, გამომცემლობის რეფერენტის ფუნქციებში, მაგრამ ის მსგავს დავალებებს არაერთხელ გასცემს. შესაბამისად, ალოგიკური არ იყო, რომ მან დეკანოზს სთხოვა აღნიშნული საკითხის გარკვევა" , - განაცხადა გიორგი ფანცულაიამ.